नेकपा एमालेका प्रदेश नं १ का प्रदेश सभा सदस्य सर्वध्वज साँवा लिम्बु मंगलबार बजेट माथिको छलफलका लागि रोष्टममा उक्लनै लाग्दै थिए। उनको नजर मुख्यमन्त्री र मन्त्रीहरूको कुर्चीमा पर्यो। बजेट माथिको छलफलमा न त मुख्यमन्त्री उपस्थित थिए न त अर्थमन्त्री नै।
औँलाले उपस्थित मन्त्री गन्दै रोष्टम उक्लिएका साँवाले व्यङ्ग्य कस्न भ्याइहाले।
'आजको विषयवस्तुमा आफ्नो धारणा राख्न चाहान्छु तर अल्छी लागिराखेको छ। बेकामे, काम नभएका माननीयहरु बसेका रहेछौं। अलिक काम भएका टाठाबाठा टाप कस्नु भएकोरहेछ', साँवाले भने, ‘ड्याम्मै भरिभराउ माननीय भइदिनुभएको भए जोश पनि लाग्थ्यो होला। अलिक कम भइसकेका छौँ।'
बोल्ने क्रममा उनले बजेटलाई सुन्तलाको बोटसँग तुलना गरे।
'ठूलो सुन्तलाको बोटमा सानो सुन्तला लटरम्म देखिन्छ। टिपेर खाउँ न भन्यो भने हातभरीको भन्ने छैन। सानो सुन्तलाको टेस्ट छैन’, साँवाले भने, ‘योजना थुप्रा बजेट साना।’
त्यसपछि उनी प्रदेशको संस्कृति जोगाउन सांस्कृतिक मेलाको लबिङ गर्न थाले।
'जिउँदो संस्कृति छ हामीसँग छ। नाचगान, भेषभूषा खाना छ’, साँवाले भने, '‘लिम्बुको च्याब्रुङ नाच छ। राई जातिको पनि छ।'
लगत्तै उनले भाका हाल्न थाले।
'डुङ्कु डङ्कु डुङ.. डुङकु डङ्कु डुङ.. ', साँवाले गीत गाउँदै व्यङ्ग्य पनि कसे, 'सोइ ढोले सोइऽऽ मुख्यमन्त्री खोइ। सोइ ढोले सोइ अर्थमन्त्री खोइ। सोइ ढोले सोइ अरू मन्त्री खोइ।'
उनले प्रदेश स्तरीय सांस्कृतिक मेला गर्न सके संस्कृति ज्यूँदो हुने बताए। हेर्नुहोस् भिडिओ