नेपाल बार एशोसिएसनले निलम्बित प्रधानन्यायाधीश चोलेन्द्रशमशेर राणालाई महाभियोग निष्प्रभावी भएको पत्र दिने संघीय संसद सचिवालयका कर्मचारीलाई कारबाही गर्न माग गरेको छ।
संसद सचिवालयका महासचिव भरतराज गौतमले आज चोलेन्द्रलाई महाभियोग निष्प्रभावी भएको पत्र दिएका थिए।
नेपाल बारका अध्यक्ष गोपालकृष्ण घिमिरे र महसचिव अन्जिता खनालले आज विज्ञप्ति जारी गर्दै संविधान, कानूनविपरीत काम गर्ने कर्मचारीलाई तत्काल कारबाही गर्न माग गरिएको छ।
‘अतः त्यस्तो सुन्यप्रभावी पत्र कार्यान्वयन नगर्न नेपाल बार एशोसिएशन सम्बद्ध निकायको ध्यानाकर्षण गर्दछ। साथै संविधान, कानून विपरीत काम गर्ने त्यस्ता कर्मचारीलाई तत्काल कारबाही गर्न नेपाल बार एशोसिएशन माग गर्दछ,’ विज्ञप्तिमा भनिएको छ, ‘उक्त कार्यबाट नेपालको संविधान, ऐन, कानून तथा संसदीय मूल्य–मान्यताको उल्लंघन भएको हुँदा सो पत्राचार गरिएको कार्य उपर नेपाल बार एशोसिएशन गम्भिर आपत्ति प्रकट गर्दछ।’
एशोसिएशनले विगतमा १०९ दिनसम्म न्यायपालिकाको समग्र सुधार, शुद्धिकरण र सुदृढीकरणका लागि प्रधानन्यायाधीश राणाको राजीनामा समेतको माग राखी निरन्तर आन्दोलनमा रहेकोसमेत उल्लेख गरिएको छ।