प्रतिनिधि सभामा सत्ता पक्षको तर्फबाट राष्ट्रिय स्वतन्त्र पार्टीकी इन्दिरा राना उपसभामुखकी उम्मेदवार छिन्।
उनलाई उपसभामुख बनाउन राष्ट्रिय स्वतन्त्र पार्टीकी सोबिता गौतम प्रस्तावक छिन्। त्यस्तै नेकपा एमालेका सांसद कृष्णगोपाल श्रेष्ठ समर्थक छन्।
तर उनले सम्बोधन गर्नेक्रममा भुलवश इन्दिराको सट्टामा सोबिताको नाम लिएका छन्।
सुरूमा उनले इन्दिराकै नाम लिए पनि बीचमा उनले सोबिताको नाम लिए।
‘माननीय सोबिता गौतमद्वारा प्रस्ताव गरिएको माननीय इन्दिरा रानालाई उपसभामुख बनाउन मैले र मेरो दलले समर्थन गरेका छौं। सभामुख महोदय त्यसै समर्थन गरेको होइन,’ उनले भने,‘ सोबिता गौतम सामान्य नाम होइन। यो सम्मानित संसदमा भन्नुपर्छ। बाल्यकाल अत्यन्तै दु:ख, कष्ट, हण्डर, ठक्कर, खाएर अगाडि बढ्नुभएको एउटा व्यक्तित्व हो।’
यसरी सांसद कृष्णगोपाल श्रेष्ठले गल्तीले आफ्नो नाम लिएपछि सोबिता पनि हासिँरहेको देखिन्छ। त्यसपछि भने श्रेष्ठले नाम सच्याएको देखिन्छ।
‘सभामुख महोदय अनेक खालका दु:ख, कष्ट, भोग्दै आज भन्दा ३० वर्ष अगाडि सुकन्या वाइबा, प्रगतिशील साहित्यकार पारिजात सँगको भेटघाटपछि उहाँले आफ्नो जीवनलाई सामाजिक रूपन्तरण परिवर्तन र समाजमा चेतना फैलाउने अनवरत रूपमा लागेको मैले जाने सम्मको कुरामा यस्तो रह्यो,’ उनले थपे, ‘बिबिसीको सबैभन्दा प्रभावशाली महिलाहरूमध्ये नेपालले गौरव गर्नुपर्छ। इन्दिरा राना मगर बिबिसीको विश्वको सयौंमध्येकी एउटा महिला हुन्।’
