सर्वसाधारणलाई रोकतोक नगरी राष्ट्रपति रामचन्द्र पौडेल काठमाडौंको बसन्तपुरस्थित कुमारी घर पुगेका छन्।
बसन्तपुरस्थित जीवित देवी कुमारीको दर्शन गर्न उनी त्यहाँ पुगेका हुन्। त्यहाँ सवारी हुँदा सवारीसाधन, सर्वसाधारण कसैलाई रोकिएको थिएन।
यसरी सवारी गरेसँगै उनले यसअघिको परम्परालाई तोडेका छन्। राष्ट्रपतिको सवारी हुँदा यसअघि सर्वसाधारणलाई रोक्ने गरिन्थ्यो। जसले गर्दा सडक जाम हुँदा आलोचना हुने गरेको थियो।
कुमारीको दर्शनपछि राष्ट्रपति पौडेलले प्रसाद ग्रहण गर्नुका साथै कुमारी घरमा चियापान गरेर फर्केका थिए। राष्ट्रपति पौडेलले पहिलोपल्ट कुमारी घरमा चिया पिएका थिए। यसअघि राष्ट्र प्रमुखले कुमारी घरमा चिया पिउने चलन थिएन।
राष्ट्रपति पौडेलले आफू निर्वाचित हुनुअघि नै सवारी जाम नगर्ने बताएका थिए।
भ्रमणका क्रममा राष्ट्रपति पौडेललाई कुमारी घरका प्रमुख गौतमरत्न शाक्य, प्रतिनिधिसभा सदस्य सपना राजभण्डारी, प्रदेशसभा सदस्य शैलेन्द्रमान बज्राचार्य लगायतले स्वागत गरेका थिए।
राष्ट्रध्यक्ष भएपछि जीवित देवी कुमारीको दर्शन गर्न जाने परम्पराअनुसार राष्ट्रपति पौडेल कुमारीको दर्शन गएका हुन्। यसअघि शनिबार बिहान कुमारीघरका प्रतिनिधिले राष्ट्रपति पौडेलसँग भेटघाट गरेका थिए।
1679139787.jpg)
