राष्ट्रिय स्वतन्त्र पार्टीका उपसभापति तथा सांसद डिपी अर्यालले सदनमा खाली कुर्सी देख्दा नीति कार्यक्रममाथि रोष्ट्रममा आएर टिप्पणी गर्नु रोष्ट्रमकै अपमान भएको बताएका छन्।
सोमबार प्रतिनिधि सभामा नीति तथा कार्यक्रममाथिको छलफलमा भाग लिँदै उनले सदनका खाली कुर्सीमाथि व्यंग्य गरेका हुन्।
‘सदनको खाली कुर्सीहरू हेर्दा आफू पनि रोष्ट्रममा आएर बोलिरहनु रोष्ट्रमकै अपमान गरेजस्तो लाग्छ। कहिलेकाहीँ, घरमै बसेर ऐनामा हेर्दै बोलेर पेनड्राइभमा रेकर्ड गरेर सचिवालयमा बुझाए पनि हुने हो कि भन्नेजस्तो लाग्छ,’ उनले भने।
प्रतिनिधि सभाका २७५ सदस्यका बीचमा हुनुपर्ने छलफल केवल रेकर्डकै लागि मात्रै भइरहेको जस्तो लाग्ने उनले बताए।
‘हलको उपस्थितिलाई हेर्दा यस्तो नहुने वातावरण बनाउन कोसिस गरौं,’ उनले भने।
नीति कार्यक्रम कामै नलाग्ने भएकाले खारेजै हुनुपर्छ भन्नु अतिशयोक्ति भएको उनले बताए।
कतिपय बुँदाहरूले आकाशको फल झारिदिन्छौँ भन्ने आश्वासन दिएको भान भएको उनको टिप्पणी थियो।
