सार्वजनिक लेखा समितिका सभापति ऋषिकेश पोखरेलले एनसेलको सेयर खरिद-बिक्री प्रकरणमा कार्यक्षेत्रभन्दा बाहिर गएर विभिन्न समितिमा छलफल हुने गरेकोमा असन्तुष्टि पोखेका छन्।
सामाजिक सञ्जाल फेसबुकमा स्टाटस राख्दै सभापति पोखरेलले भ्रष्टाचार छोप्न कार्यक्षेत्रभन्दा बाहिर गई विभिन्न समितिले एनसेलबारे छलफल गरेको उल्लेख गरेका छन्।
एनसेलबारे राज्य व्यवस्था तथा सुशासन समितिको मंगलबारको बैठकमा प्रधानमन्त्री पुष्पकमल दाहाल 'प्रचण्ड' ले जवाफसमेत दिएका थिए।
‘सरकारी सुण्ड मुसुण्डहरू एनसेल भ्रष्टाचार काण्डसम्बन्धी सार्वजनिक लेखा समितिले गरेको निर्णयलाई र सरकारलाई दिएको दवावलाई कमजोर बनाउन र भ्रष्टाचारलाई छोप्न आफ्नो कार्यक्षेत्रभन्दा बाहिर विभिन्न संसदीय समितिहरूमार्फत् विषय बङ्ग्याउने र जनतालाई भ्रम छर्ने कामको खेद व्यक्त गर्दछु,’ सभापति पोखरेलले लेखेका छन्, ‘जनतालाई सचेत हुन अपिल गर्दछु।’
लेखा समिति सभापति पोखरेल प्रमुख प्रतिपक्षी नेकपा एमालेका सांसद पनि हुन्।
लेखा समिति सभापतिले राज्य व्यवस्था समितिमा भएको एनसेलको छलफलप्रति लक्षित गर्दै असन्तुष्टि जनाएपछि यसबारे राज्य व्यवस्था समितिको बुधबारको बैठकमा चर्चा भएको छ।
सत्तारूढ नेपाली कांग्रेसका सांसदसमेत रहेका महामन्त्री गगन थापाले सार्वजनिक लेखा समितिका सभापतिले कार्यक्षेत्रका कुरा उठाएकोमा सभामुखसँग कुरा गर्न राज्य व्यवस्था समिति सभापति रामहरि खतिवडालाई आग्रह गरेका थिए। खतिवडा कांग्रेसका सांसद पनि हुन्।
समिति सभापति खतिवडाले आफूले सभामुखसँग कार्यक्षेत्र लगायतका विषयमा कुरा गर्ने बैठकमा जानकारी गराएका छन्।
