रामराजाप्रसाद सिंह स्वास्थ्य विज्ञान प्रतिष्ठान निर्माण सुरू गर्न सप्तरी युथ नेपालले प्रधानमन्त्री पुष्पकमल दाहाल प्रचण्डलाई १० हजार १५१ जनाको हस्ताक्षर बुझाएका छन् ।
नाराजुलुस प्रदर्शन र धर्ना बसेर मागको सुनुवाइ नभएपछि आन्दोलनरत युवाहरुले बिहीबार प्रधानमन्त्री निवास बालुवाटारमा हस्ताक्षर र ज्ञापनपत्र बुझाउँदै अबिलम्ब निर्माण कार्य अघि बढाउन माग गरेका हुन्।
विगत एक महिनादेखि दवाबस्वरूप गरिएको आन्दोलनपछि पनि सरकारले शिलान्यास गरेर अलपत्र छोडेको सप्तरीको राजविराजस्थित रामराजाप्रसाद सिंह स्वास्थ्य विज्ञान प्रतिष्ठानको काम गर्न बेवास्ता गरेपछि हस्ताक्षर सहित ज्ञापनत्रप बुझाएको सप्तरी युथ नेपालका कार्यबाहक अध्यक्ष मोहनकुमार यादवले बताए।
उनका अनुसार दबाबमूलक कार्यक्रमकै क्रममा सप्तरी जिल्लाका १० हजार १५१ जना नागरिकको हस्ताक्षर संकलन गरिएको थियो।
‘सप्तरीको शैक्षिक स्वास्थ्य र आर्थिक क्षेत्रका लागि महत्वपुर्ण कोषेढुंगा सावित हुने रामराजाप्रसाद सिंह स्वास्थ्य विज्ञान प्रतिष्ठान निर्माणको सरकारी प्रयासले सप्तरी जिल्लाका नागरिकमा आशाको किरण जागेको थियो। तर शिलान्यास भइसक्दा पनि प्रतिष्ठान निर्माणको कार्य फेरि आएर ओझेलमा परेपछि समग्र जिल्लाबासी एकपटक फेरि निराश भएका छौँ, ज्ञापनपत्रमा भनिएको छ ।
एक प्रदेश, एक स्वास्थ्य विज्ञान प्रतिष्ठान निर्माण गर्ने नीतिअनुसार ०७५ साल पुस १६ गते मन्त्रिपरिषद्को बैठकले राजविराजमा रामराजाप्रसाद सिंह स्वास्थ्य विज्ञान प्रतिष्ठान निर्माण गर्ने निर्णय गरेको थियो। २०७८ जेठ २८ गते बसेको मन्त्रिपरिषदको बैठकले प्रतिष्ठान निर्माण गर्न राजविराज नगरपालिका–१० बिरौलस्थित रहेको ६२ बिघा जग्गा प्रतिष्ठानका नाममा ३० वर्षका लागि लिजमा दिने निर्णय गरेको थियो।
तत्कालीन प्रधानमन्त्री केपी शर्मा ओलीले २०७८ असार २२ गते प्रतिष्ठानको भवन निर्माण कार्यको भर्चुअल माध्यमबाट शिलान्यास गरेका थिए। तर, शिलान्यासको दुई वर्षभन्दा बढी समय बितिसक्दा पनि निर्माण कार्य सञ्चालन हुन सकेको छैन।
अध्यक्ष डा.रोहित पोखरेल प्रदेश सभाको निर्वाचनमा उम्मेदवार बनेपछि प्रतिष्ठानको पूर्वाधार तयारी विकास समितिको कार्यालय समेत अहिले नेतृत्वबिहीन बनेको छ।
गजेन्द्रनारायण सिंह अस्पतालका तत्कालीन मेडिकल सुपरिटेन्डेन्ट एवं प्रतिष्ठानका कार्यकारी निर्देशक डा. रञ्जितकुमार झा सरुवा भएर अन्यत्र गएपछि कार्यकारी निर्देशकको पदसमेत रिक्त छ। कार्यालयमा करारमा रहेका तीनजना कर्मचारीको म्याद समेत थप गरिएको छैन।
पूर्वाधार तयारी विकास समितिको गठन आदेशको म्याद समाप्त भइसकेको र विकास समितिमा अध्यक्ष, कार्यकारी निर्देशक लगायतका पदाधिकारी पद रिक्त छ ।
प्रतिष्ठानको पूर्वाधार तयारी विकास समितिको कार्यालय अहिले बोर्डमा मात्र सीमित भएको छ भने प्रतिष्ठान निर्माणस्थल राजविराज १० बिरौलको जग्गा अहिले खेलमैदान र चरण क्षेत्रमा परिणत भएको छ।
