नेपाली कांग्रेसका महामन्त्री विश्वप्रकाश शर्माले अवैध तरिकाले रूस गई त्यहाँको सेनामा भर्ती भएका नेपाली युवाहरूलाई तत्काल फिर्ता ल्याउने पहल गर्न प्रधानमन्त्री पुष्पकमल दाहाल ‘प्रचण्ड’सँग माग गरेका छन्।
शनिबार नेपाली कांग्रेसको बाग्मती प्रदेश सम्मेलनलाई सम्बोधन गर्दै महामन्त्री शर्माले रूस-युक्रेन युद्धमा अवैध तरिकाले प्रयोग भइरहेका नेपाली युवाहरूलाई फिर्ता ल्याउनेबारे सरकारले चासो नदिएको बताउँदै प्रधानमन्त्री प्रचण्डलाई पहल थालिहाल्न आग्रह गरेका हुन्।
अवैध तरिकाले रूस पुगेका र त्यहाँ पुगेर सेनामा लागेर बिचल्लीमा परेकाहरूसँग आफ्नो दैनिक कुरा भएको बताउँदै महामन्त्री शर्माले त्यहाँबाट निकाल्न राजदूतसँग नभए राष्ट्रपति भ्लादिमिर पुटिनसँगै प्रधानमन्त्री प्रचण्डले कुरा गर्नुपर्ने बताएका हुन्।
‘तिनको लास मात्रै गनेर बसेर सरकारको कर्तव्य पूरा हुँदैन । कुरा गर्नुस् राजदूतसँग,’ उनले भने, ‘राजदूतलाई कुरा गरेर हुँदैन भने भ्लादिमिर पुटिनसँग कुरा गर्नुस्।’
महामन्त्री शर्माले अवैध तरिकाले रूसी सेनामा पठाउनेलाई कारबाही गर्ने र त्यहाँ पुगेका नेपालीहरूलाई सुरक्षित नेपाल फर्काउने दुबै काम सरकारको कर्तव्य भएको बताए।
‘संगै गएका साथी घाइते भएर फर्केका छन्, कैलालीका एउटा साथीको मृत्यु भएको छ। हामीलाई आजै पठाउन सक्छ, भरे पठाउन सक्छन् भनिरहेका छन्। सिसी क्यामेराले घेरेर राखेको छ। भाग्ने सक्ने ठाउँ छैन,’ उनले भने, ‘यो प्रकारको लडाइँमा वीर नेपालीहरूको प्रयोग भएको दृश्य हाम्रो लागि सुहाउँदो छ?’
महामन्त्री शर्माले इसराइलबाट नेपाली विद्यार्थी फर्काउन सरकारले गरेको काम भने प्रशंसायोग्य रहेको बताए। अब यसैगरी रसियाबाट पनि नेपाली युवाहरू फिर्ता ल्याउनुपर्ने उनले बताए।
‘अब रसिया परराष्ट्रमन्त्री जानुपर्ने हो वा अर्को कसलाई पठाउनुपर्ने हो। राजदूतसँग कुरा गर्नुपर्ने हो या पुटिनसँग कुरा गर्नुपर्ने हो। तर, नेपाली युवाहरूलाई फिर्ता ल्याउनुस्,’ उनले भने।
