नेपाली कांग्रेसका महामन्त्री विश्वप्रकाश शर्माले प्रदेशलाई अधिकारसम्पन्न गराउनेगरी कानुन नल्याइए सिंहदरबार घेर्ने चेतावनी दिएका छन्।
शनिबार कांग्रेसको बाग्मती प्रदेश सम्मेलनलाई सम्बोधन गर्दै महामन्त्री शर्माले कांग्रेसको महासमिति बैठक सुरू हुनुअघि नै कानुन नल्याइए सिंहदरबार घेर्न आफूपनि जाने बताएका हुन्।
कांग्रेसको महासमिति बैठक फागुन ७ देखि १० गतेसम्म गर्ने निर्णय गरेको छ।
‘कांग्रेसको महासमिति बैठक हुँदासम्म त्यो अधिकारसम्पन्न बनाउनेगरी कानुन आएन भने महासमितिको बैठकबाट निर्णय गरेर हामी खुद सिंहदरबार घेर्नका लागि प्रदेशका साथीसहित उपस्थित हुनेछौं,’ उनले भने।
महामन्त्री शर्माले प्रदेशले मागेको अधिकार दिन नसक्नुको कारण पनि सोधेका छन्।
‘युरेनियम मागेका होइनन्। अन्तरिक्ष यान मागेका होइनन् अक्षरमा लेखिएका कागजहरू मागेका हुन्। कानुनहरू मागेका हुन्। त्यो दिने कुरामा प्रधानमन्त्रीले गम्भीरतापूर्वक ध्यान दिनुपर्छ,’ उनले भने।
