नेपाली कांग्रेसका उपसभापति पूर्णबहादुर खड्काले पञ्चायतलाई परास्त गर्न कृष्णप्रसाद भट्टराईको भूमिका महत्वपूर्ण रहेको बताएका छन्।
भट्टराईको शताब्दी जन्म दिवसका अवसरमा केन्द्रीय कार्यालय सानेपामा आइतबार भएको कार्यक्रममा बोल्दै उपप्रधान तथा रक्षमामन्त्रीसमेत रहेका खड्काले पञ्चायतविरुद्धको आन्दोलनलाई नेपाली माटोबाटै लडेर जित्नको लागि भट्टराईले स्वदेशमै बसेर आन्दोलनको नेतृत्व गरेको बताए।
‘बिपी कोइराला लगायतका नेताहरु प्रवास जानुभयो, त्यहाँबाट पनि संघर्ष गर्नुभयो। तर किसुनजीले पञ्चायतविरुद्धको आन्दोलनलाई र लोकतन्त्रको पुनःस्थापनाका लागि पनि नेपाली माटोमै बस्नुभयो,’ उनले भने।
नेपालमै बसेर पञ्चायतलाई परास्त गर्नुपर्छ भन्ने धारको भट्टराईले नेतृत्व गरेको उनले बताए।
‘उहाँले देखाएका बाटो, निष्ठाको कुरा गर्छौं, जीवन जगतको कुरा गर्छौं, त्यसमा कति प्रतिशत उहाँको बाटोमा हिँडाउन सकेका छौँ, त्यसमा हामीले स्मरण गर्दै भएका कमजोरी सच्याउने, गल्ती नगर्ने र हुन दिने छैनौँ,’ उनले भने।
