लोकतान्त्रिक समाजवादी पार्टी (लोसपा) का नेता राजेन्द्र महतोले मधेसवादी दलहरू सत्ताको सुखमा बस्न नहुने बताएका छन्।
उनले मधेसवादी चार दल संघर्षमा आउनुपर्ने बताए।
सप्तरीको राजबिराजमा मंगलबार भएको पत्रकार सम्मेलनमा बोल्दै महतोले भने, ‘मधेसवादी पार्टी लोसपा, जसपा, जनमत र नागरिक उन्मुक्ति पार्टी सत्ता सुखमा बस्ने होइन। संघर्षमा आउनुपर्यो।’
मधेसको हितका लागि आफू मेची-महाकाली आन्दोलनमा हिँड्न लागेको उनको भनाइ छ। ‘सत्ता सुखमा बसेका मधेसवादी दल मधेस संकटमा पर्दा संघर्षमा आएनन् भने जनताले तानेर ल्याउँछन्, जनतामा त्यो तागत छ,’ उनले भने।
मधेस आन्दोलनका आन्दोलनकारीलाई आजिवन काराबासको आदेश भएको भन्दै उनले असन्तुष्टि जनाएका छन्।
‘मधेस आन्दोलनलाई यसरी अपराधीकरण र दण्डित गर्न मिल्दैन,’ उनले भने, ‘मधेस आन्दोलन गर्दै नगर। अधिकारका लागि नलड भन्नु मान्य छैन। यो देशमा कति आन्दोलन भयो, कहाँ कसलाई आजिवन काराबास भयो? मधेसी जनतालाई मात्रै आजीवन काराबास हुनुपर्ने हो? गिरिजाप्रसाद कोइरालाको नेतृत्वमा भएको आन्दोलनमा पनि पुलिस मरेको थ्यो, माओवादीकोमा हजारौं मानिस मारियो त्यो राजनीतिक घटना भयो? यो अधिकार पहिचान आन्दोलनमाथि अत्याचार हो।’
लोसपा अध्यक्ष महन्थ ठाकुर पनि संघर्ष र आन्दोलन गर्न तयार नदेखिएको उनले बताए। मधेस आन्दोलनलाई अपराधीकरण गर्न खोजिएको भन्दै उनले त्यसका लागि संघर्ष गर्नुपर्ने बताए।
‘लोसपा आन्दोलन गर्न तयार भएन। म लोसपाकै सदस्य छु। मधेसमा अत्याचार हुँदा सत्तामा बस्नु हुन्न,’ अध्यक्ष ठाकुरलाई लक्षित गर्दै उनले भने, ‘महन्थ ठाकुर कांग्रेसबाट आएका होलान् तर लोसपा मधेसवादी पार्टी हो। दर्जनौं मधेसवादीलाई उहाँले लोसपाको केन्द्रीय समितिबाट निकाल्नुभएको छ।’
उनले मधेस जोगाउने आफूहरूको मिसन भएको बताए। ‘आन्दोलन जोगिएन भने के मधेसवादी दलको मिसन ०८४ हुन्छ?,’ उनले भने, ‘मधेसवादी पार्टी मधेस आन्दोलनबाट उदाएको हो। सत्ताको सुख भोगिराख्ने अनि मिसन ०८४ भनेर हुन्छ? नो मिसन ०८४। हाम्रो मिसन भनेको मधेस आन्दोलन जोगाउने हो।’
जनताका लागि मधेसवादी दल लडेनन् भने सकिने उनले बताए। ‘चारवटै मधेसवादी पार्टी सत्ता छाडेर आउनुपर्छ,’ उनले भने, ‘आएन भने सकिने हो। त्यही जनताले तागत दिएको हो, सत्तामा बसिरहेको छ।’
