नेपाली कांग्रेसको भ्रातृ संस्था नेपाल विद्यार्थी संघले त्रिभुवन विश्वविद्यालयको उपकुलपति योग्य, दक्ष र क्षमतावान व्यक्तिलाई बनाउन माग गरेको छ।
त्रिविका कुलपतिसमेत रहेका प्रधानमन्त्री पुष्पकमल दाहाल प्रचण्डलाई पत्र लेख्दै नेविसंघ कार्यकर्ताहरूले खुला प्रतिस्पर्धाबाट योग्यलाई उपकुलपति नियुक्त गर्न माग गरेका हुन्।
उनीहरूले उपकुलपति राजनीतिक भागबन्डाका आधारमा नगर्न पनि आग्रह गरेका छन्।
नेविसंघ नेता विनोद देउवाले खुला प्रतिस्पर्धाबाट उपकुलपति नियुक्त गर्न पत्र अभियान सञ्चालन गरिएको बताए।
त्रिवि केन्द्रीय क्याम्पस र उपत्यकाभित्रका आंगिक तथा सम्बन्धनप्राप्त ५१ क्याम्पसबाट पत्र अभियान सञ्चालन गरिएको उनको भनाइ छ। प्रधानमन्त्रीलाई सम्बोधन गर्दै नेविसंघले योग्य व्यक्तिलाई उपकुलपति बनाउन पत्र लेख्दै माग गरेको छ।
यो अभियानबाट १२ हजार चार सय १५ विद्यार्थीको हस्ताक्षरसहितको पत्र प्रधानमन्त्रीलाई बुझाउने तयारी पनि नेविसंघको छ। विश्वविद्यालयलाई दलीयकरण र राजनीतिक भागबन्डाको अन्त्यका लागि पत्र अभियानमा जोडिन पनि नेविसंघले आग्रह गरेको छ।
यो अभियान बिहीबारदेखि काठमाडौं उपत्यकाबाहिरका क्याम्पसमा पनि सुरू हुने उनले बताए।
