राष्ट्रिय प्रजातन्त्र पार्टी (राप्रपा) को पदाधिकारी बैठकले चार वटा निर्णय गरेको छ।
केन्द्रीय कार्यालय धुम्बाराहीमा आइतबार बसेको बैठकले राष्ट्रिय सभा चुनावका लागि आकांक्षीका नाम सिफारिस गर्न प्रदेश कार्यसमितिलाई जिम्मेवारी दिनेलगायत निर्णय गरेको हो।
‘राष्ट्रिय सभाको निर्वाचनको प्रयोजनका लागि पुस १८ गतेसम्म उमेदवार सिफारिस गरी पार्टीको संसदीय समितिलाई पठाउन प्रदेश कार्यसमितिलाई जिम्मेवारी दिइएको छ,’ प्रवक्ता मोहन श्रेष्ठले भने।
साथै राप्रपाले ३०२ औं पृथ्वी जयन्ती विविध कार्यक्रम गरी मनाउने निर्णय गरेको छ। जयन्तीका अवसरमा काठमाडौंमा चियापान कार्यक्रम गरिने उनले बताए।
भृकुटीमण्डपबाट सिंहदरबार अगाडि रहेको पृथ्वी शालिकसम्म ऱ्याली गर्ने तथा 'पृथ्वीनारायण' शीर्षकमा ४० वर्ष मुनिका युवा कविता प्रतियोगिता गर्ने निर्णय गरिएको उनको भनाइ छ।
काठमाण्डौ, ललितपुर, भक्तपुर बाहेक ७४ जिल्लामा पनि पृथ्वी जयन्ती मनाउने र सोका लागि प्रत्येक जिल्लामा केन्द्रीय प्रतिनिधि खटाउने निर्णय गरिएको प्रवक्ता श्रेष्ठले जानकारी दिए।
पार्टीले गर्ने भनेको आन्दोलनलाई व्यवस्थित र प्रभावकारी ढंगबाट सञ्चालन गर्न महामन्त्री धवलशमसेर राणाको संयोजकत्वमा रहेको आन्दोलन परिचालन समितिलाई पूर्णता दिइएको राप्रपाले जनाएको छ। यो समिति समिति ११ सदस्यीय हुनेछ।
'नवीन राप्रपा' कार्ययोजना अन्तर्गत ४० वर्ष मुनिका २० जना युवााई पार्टीको केन्द्रीय समितिमा लैजाने यसअघिको निर्णयलाई कार्यान्वयन गर्न र प्राप्त निवेदनमध्येबाट छनोटका लागि योग्यता र मापदण्ड तय गर्न वरिष्ठ उपाध्यक्ष रवीन्द्र मिश्र, प्रवक्ता गोपाल दाहाल र सहमहामन्त्री प्रकाश रिमाल रहेको समिति गठन भएको छ।
