प्रधानमन्त्री पुष्पकमल दाहाल ‘प्रचण्ड’ले सरकारले गरेको राम्रो कामको समर्थन गर्न कांग्रेसले हिच्किचाउन नहुने बताएका छन्।
४८ औं राष्ट्रिय मेलमिलाप दिवसको अवसरमा सोमबार नेपाली कांग्रेसले आयोजना गरेको कार्यक्रममा बोल्दै उनले जोखिम उठाएर सहमति र सहकार्यको वातावरण बनाएकाले यसको गहिराइ बुझ्न पनि अपिल गरे।
‘प्रचण्ड अहिले यो पटक सानो पार्टीको नेता, के–के कता–कताबाट प्रधानमन्त्री भयो भनेर नेपाली कांग्रेसले सरकारले गरेका राम्रा काम खुलेर समर्थन गर्न, स्वामित्व लिन डराइदिन भएन। हिच्किचाइदिन भएन,’ उनले भने, ‘एउटा समझदारी र सहमतिले, मेरो तर्फबाट भन्ने हो भने जोखिम उठाएर यो वातावरण बनेको छ।यसको महत्त्व र गहिराइलाई बुझिदिन अपिल गर्छु।’
शान्ति प्रक्रियाका बाँकी काम टुंग्याउन नेपाली कांग्रेस, नेकपा (एमाले), माओवादी केन्द्रका शीर्ष नेता बस्ने गरेको सन्दर्भ पनि निकाले। ४८ औं राष्ट्रिय मेलमिलाप दिवसले देशभर राष्ट्रिय एकता, सहमति प्रवाहित गरेको पनि उनले बताए।
‘यो सबै सन्दर्भ र पृष्ठभूमिमा आजको यो कार्यक्रमले देशभरि एउटा सन्देश प्रवाहित गर्यो– राष्ट्रिय एकता, सहमतिको आजको सन्दर्भमा। जनताका आशा अपेक्षा सम्बोधन गर्ने एउटा नयाँ संकल्पको एकताको वातावरण बनायो भन्ने मलाई लाग्छ। सरकारका कामहरूको बारेमा म अहिले धेरै भन्न चाहन्नँ। हामीले सरकारलाई प्रभाकारी बनाउन धेरै भन्ने भन्दा पनि आफैंले केही चिज नयाँ सुरूआत गर्छु भनेर मैले सुरू गरेको मात्रै छु, दोस्रो वर्ष लागेपछि,’ उनले भने, ‘म चाहन्छु हाम्रा गठबन्धनका सबै नेताहरूले कार्यकर्ता र संघीय लोकतान्त्रिक गणतन्त्र पक्षधरहरूले त्यसमा सहयोग गरून् भन्ने मेरो अपेक्षा छ। राम्रा काम गरेकालाई अपनत्व लिन डराउनु पनि भएन।’
-ink-1704108597.jpeg)
