नेपालस्थित भारतीय दूतावासले सिधै परियोजनाहरूमा लगानी गर्ने रकम बढाएर २० करोड रूपैयाँ पुर्याउन लागेको छ।
भारतले नेपाललाई प्रदान गर्दै आएको उच्च प्रभाव सामुदायिक विकास परियोजना (एचआइसिडिपी) अन्तर्गतको रकम २० करोड रूपैयाँ (नेपाली) पुर्याउन नेपाल र भारत सहमत भएका र यसबारे बिहीबार सम्झौता हुने एक मन्त्रीले बताए।
भारतीय विदेशमन्त्री एस जयशंकरको नेपाल भ्रमणका क्रममा उक्त सहयोगसम्बन्धी सम्झौतामा हस्ताक्षर हुन लागेको छ।
यसअघि भारतीय दूतावासले एचआइसिडिपी अन्तर्गत पाँच करोड रूपैयाँसम्म सिधै परियोजनाहरूमा लगानी गर्थ्यो। भारतले यो रकम नेपालस्थित भारतीय दूतावासमार्फत् सिधै खर्च गर्न पाउँछ। परियोजनाहरू आफैं छनौट र तिनको कार्यान्वयन पनि आफैं गर्छ।
मन्त्रिपरिषदको गत मंसिर २१ को बैठकले एचआइसिडिपी अन्तर्गतको सहयोग स्वीकार गर्ने निर्णय गरिसकेको छ। नेपाल सरकारले मंसिरमा सैद्धान्तिक सहमति दिएपछि भारतले सहयोग रकम थप गर्ने प्रक्रिया अघि बढाएको हो।
'सुरूमा भारतले २४ करोड रूपैयाँ सहयोग गर्ने प्रस्ताव गरेको थियो। प्रधानमन्त्री, अर्थमन्त्री र परराष्ट्रमन्त्रीले परामर्श गरेपछि अहिले २० करोड रूपैयाँ स्वीकार गर्ने सहमति बनेको छ‚' उच्च सरकारी स्रोतले सेतोपाटीसँग भन्यो।
भारतीय दूतावासले यसरी नेपालका परियोजनाहरू आफैं छनौट र तिनको आफैं कार्यानन्वयन गर्ने कुराको आलोचना हुँदै आएको छ। २०५९ सालसम्म भारतले यसरी सिधै लगानी गर्दैन थियो।
तत्कालीन राजा ज्ञानेन्द्र शाहले जननिर्वाचित प्रधानमन्त्री शेरबहादुर देउवालाई २०५९ सालमा अपदस्थ गरे। त्यसपछि केही समय लोकेन्द्रबहादुर चन्द प्रधानमन्त्री नियुक्त भए। २०६० सालमा राजा ज्ञानेन्द्रले सूर्यबहादुर थापालाई प्रधानमन्त्री नियुक्त गरेका थिए। पहिलोपटक थापाका पालामा भारतीय दूतावासले सिधै तीन करोड रूपैयाँसम्म लगानी गर्न पाउने गरी सहमति भएको थियो।
पछि बाबुराम भट्टराई प्रधानमन्त्री भएका बेला, २०६८ सालमा उक्त सहयोग रकम बढाएर ५ करोड रूपैयाँ पुर्याइएको थियो।
त्यो बेला पनि दूतावासले सिधै लगानी गर्न सक्ने रकम बढाइएको भन्दै आलोचना भएको थियो।
यसपालि झनै त्यस्तो रकम चार गुणाले बढ्न लागेको हो।
भारतले यो रकम शिक्षा‚ स्वास्थ्य‚ खानेपानी‚ कृषि‚ विपन्न वर्गलाई सहयोग तथा तालिम शीर्षकमा खर्च गर्दै आएको छ।
यस्तो छ भारतीय विदेशमन्त्री जयशंकरको भ्रमण तालिका
भारतका विदेशमन्त्री एस जयशंकर बिहीबार नेपाल आउँदैछन्। नेपाल-भारत परराष्ट्र मन्त्रीस्तरीय आयोगको बैठकमा सहभागी हुन नेपाल आउन लागेका जयशंकर भारतीय सेनाको विशेष विमानमार्फत् बिहीबार बिहान १० बजे त्रिभुवन अन्तर्राष्ट्रिय विमानस्थलमा उत्रिँदैछन्। दुई दिनसम्म नेपालमा रहँदा उनले उच्चपदस्थ राजनीतिक नेतृत्वहरूसँग पनि भेटघाट गर्ने कार्यक्रम रहेको नेपालस्थित भारतीय दूतावासले जनाएको छ।
दूतावासका अनुसार मन्त्री जयशंकरले बिहीबारै उच्चपदस्थ राजनीतिक भेटघाट गरेर सक्नेछन्।
राष्ट्रपति रामचन्द्र पौडेललाई भेट्न बिहीबार बिहान ११ बजे शितल निवास जानेछन् भने १२ बजे प्रधानमन्त्री निवास बालुवाटारमा प्रधानमन्त्री पुष्पकमल दाहाल 'प्रचण्ड' सँग भेटघाट हुँदैछ। दिउँसो १ बजे परराष्ट्रमन्त्रीस्तरीय आयोगको बैठकमा सहभागी भएपछि मन्त्री जयशंकरले दिउँसो ३ बजेर ४० मिनेटमा नेपाली कांग्रेसका सभापति शेरबहादुर देउवा र साढे ४ बजे एमाले अध्यक्ष केपी शर्मा ओलीसँग भेटघाट गर्दैछन्।
जयशंकर शुक्रबार बिहान ८ बजे पूजाआजाका लागि पशुपति जाने कार्यक्रम पनि छ। दुई दिने भ्रमण सकेर उनी शुक्रबारै १२ बजे भारत फर्किने दूतावासले जनाएको छ।
