मुलुकलाई सही बाटोमा हिँडाउन ‘मोरल अथोरिटी’ प्रयोग गर्न नागरिक समाजका अगुवा तथा प्रबुद्ध वर्गले राष्ट्रपति रामचन्द्र पौडेललाई सुझाव दिएका छन्।
सोमबार नागरिक समाजका अगुवाहरूले देशमा देखिरहेका बेथिति र अव्यवस्थालाई अन्त्य गरेर मुलुकलाई सही बाटोमा हिँडाउन ‘मोरल अथोरिटी’ प्रयोग गर्न सुझाव दिएको राष्ट्रपतिका प्रेस सल्लाहकार किरण पोखरेलले जानकारी दिए।
उनका अनुसार लोकतन्त्र, संघीयता, सुशासन सुदृढीकरण र शिक्षा क्षेत्रको बेथिती अन्त्य गर्ने विषयमा उनीहरूले महत्वूर्ण सुझाव दिएका छन्।
'सत्तामा रहेकाहरूको आचरणबाट लोकतन्त्र कमजोर बनाउन चाहनेहरूलाई बल नपुगोस भन्दै सचेत रहन सुझाव दिएका हौं,' सहभागी एक नागरिक अगुवाले भने।
दमननाथ ढुंगाना, देवेन्द्रराज पाण्डे, होमनाथ दाहाल, प्राध्यापक पिताम्वर शर्मा र केदारभक्त माथेमाले राष्ट्रपति पौडेललाई भेटेर सुझाव दिएका थिए।
