राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनले राप्रपाले अहिलेको अवस्थामा सभामुख लिन हुन्छ कि हुन्न भनेर पार्टीभित्र दुई तर्क आइरहेको बताएका छन्।
कोशीमा सभामुख लिन अहिले हतार गर्न हुन्न भन्नेमा केन्द्रीय पदाधिकारीको सहमति भएका बेला प्रदेशले निर्णय गरेर सभामुख लिएको पनि उनले बताए। राप्रपा सांसद अम्बरबहादुर विष्ट गत पुस २४ गते कोशीको सभामुख भएका थिए।
यो पनि: अम्बरबहादुर विष्ट बने कोशी प्रदेशको सभामुख
‘कोशीमा मात्र सभामुखमा हामी सहभागी भएको होइन। योभन्दा अघि बागमती र लुम्बिनीमा उपसभामुखमा हाम्रो सहभागीता छ, यो नौलो कुरा भएन,’ पृथ्वी जयन्तीका अवसरमा भृकुटीमण्डमा भएको जलपान समारोहमा शुक्रबार पत्रकारहरूसँग कुराकानी गर्दै अध्यक्ष लिङ्देनले भने, ‘परिवर्तित सन्दर्भमा अहिले कोशीमा सभामुख लिने कि नलिने छलफलकै विषय थियो। हतार गर्न हुन्न भन्ने हाम्रो सहमति थियो। म देश बाहिर भएका बेला कोशीका साथीहरूले निर्णय गरेर सहभागी हुनुभयो।’
यो विषयमा पार्टीभित्र फरक-फरक मत देखिएको उनले बताए।
‘एकथरि साथीहरूले चर्को स्वरमा कोशीमा सभामुखमा सहभागी हुन हुँदैनथ्यो, तुरून्त फिर्ता हुनुपर्छ भन्ने छ,’ लिङ्देनले भने, ‘अर्कोतर्फ साथीहरूको के तर्क छ भने कोशीमा मात्र होइन अन्यत्र पनि सहभागी छौं भन्ने छ। कुनै सर्तमा हामी सभामुख लिएको होइन। सांसद हुने सभामुख लिन नहुने भन्ने पनि छ। केन्द्रीय समिति बैठकले यस विषयमा उचित निर्णय गर्छ।’
उनले फागुनदेखि देखिने गरी आन्दोलन गरिने पनि बताए।
यो पनि: राप्रपाभित्र 'कडा र नरम राजावादी' बीच बढ्दो टकराब!
