प्रधानमन्त्री पुष्पकमल दाहाल ‘प्रचण्ड’ले असंलग्नता र यसका सिद्धान्तहरू नेपालको परराष्ट्र नीतिको आधारभूत मान्यता रहेको बताएका छन्।
अफ्रिकी मुलुक युगाण्डाको राजधानी कम्पालमा सम्पन्न असंलग्न आन्दोलन (नाम) को १९ औं शिखर सम्मेलनमा सहभागी भएर काठमाडौं फर्किएपछि आइतबार अन्तर्राष्ट्रिय विमानस्थलमा पत्रकारहरूसँग कुरा गर्दै उनले यस्तो बताएका हुन्।
प्रधानमन्त्री प्रचण्डले नामको पहिलो सम्मेलन देखिनै नेपालले असंलग्नताका आधारमा अन्तर्राष्ट्रिय रूपमा जटिल परिस्थितिहरूका बाबजुद सबै अवस्थामा मौलिक दृष्टिकोणका साथ स्वतन्त्र परराष्ट्र नीति अवलम्बन गर्दै आएको बताए।
सन् १९५५ मा इण्डोनेसियाको बाङडुङमा सम्पन्न एसिया-अफ्रिका सम्मेलनले विकासशील तथा विकासोन्मुख मुलुकहरू रहेको असंलग्न आन्दोलन पारित गरेको थियो।
साथै प्रधानमन्त्री दाहालले एक चीन नीति मानिसकेपछि ताइवान स्वतन्त्र हुनुपर्छ भन्ने पक्षमा नेपाल नरहेको बताएका छन्।
ताइवानको बारेमा नेपालको सुरुदेखिकै नीति चीनकै अंग हो भन्ने रहेको उनले बताए। ताइवान चीनको हो भन्दैमा नेपालको असंलग्न परराष्ट्र नीति नडग्मगाउने उनले बताएका छन्।
‘ताइवानको कुरा पनि जोडेर राख्नुभयो। ताइवानको विषयमा नेपालको सुरुदेखिको नीति के हो भने एक चीन नीति भन्दा ताइवान पनि चीनकै अंग हो भन्ने नीति नेपालको सुरुदेखि नै रही आएको छ। त्यो भन्दा बाहिर हामीले बनाएका छैनौँ। एक चीन नीति मानिसकेपछि हामी ताइवान अलग हुनपर्छ भन्ने नीतिको पक्षमा छैनौँ,’ उनले भने।
