उपप्रधानमन्त्रीसमेत रहेका रक्षामन्त्री पूर्णबहादुर खड्काले १६ औँ आवधिक योजनाका बारेमा राष्ट्रिय योजना आयोगका पदाधिकारीसँग छलफल गरेका छन्।
रक्षा मन्त्रालयमा मंगलबार भएको छलफलमा खड्काले योजना आयोगका उपाध्यक्ष, सदस्य र सचिवालयका अधिकारीहरूसँग १६ औँ आवधिक योजनाका बारेमा छलफल गरेका हुन्।
खड्काले विगतमा बनाएका योजना के-कति कारणले पूरा भएनन्, तिनको समस्या पत्ता लगाई समाधानका उपायसहित १६ औँ योजना तर्जुमा गर्न सुझाव दिएका थिए।
आवधिक योजना बनाउँदा विभिन्न कारणले विकास निर्माणमा पछि परेका प्रदेशलाई क्षतिपूर्ति सहितको योजना बनाउने विषयमा पनि योजना आयोगका पदाधिकारीलाई उनले ध्यानाकर्षण गराएका छन्।
यसरी योजना बनाउँदा सम्बन्धित प्रदेशका जनताले अनुभूति गर्ने र व्यवहारमा लागू हुने गरी बनाउनेपर्ने उनले बताए।
छलफलमा उनले आगामी योजना तर्जुमा गर्दा देशको भूगोल र मौसमअनुसार कहाँ के उत्पादन हुने हो त्यसको ठोस अनुसन्धान गर्न र किसानको उद्पादनले बजार पाउने सुनिश्चितता गर्ने कुरालाई उच्च प्राथमिकतामा राख्न पनि आग्रह गरेका छन्।
अहिले विकास निर्माण गर्दा देखा परेका धेरैजसो समस्या र तिनको समाधानसहित नयाँ योजना तर्जुमा गर्नुपर्नेमा जोड दिँदै खड्काले अहिले विकास निर्माण गर्दा देखा परिरहेका लामो प्रशासनिक प्रक्रिया, जग्गा प्राप्ती र रुख कटानीको झन्झटिलो व्यवस्थाको सहि विकल्प पहिचान गरी योजना तर्जुमा गर्न योजना आयोगलाई आग्रह गरेका थिए।
कुनै पनि योजना बनाउँदा जनताले दैनिक रुपमा भोगिरहेका समस्याको समाधान हुने र जनताले पाउने सेवा सुविधालाई थप सहज बनाउने गरी समग्रतामा उल्लेख गरी कार्यान्वयन योग्य लक्ष्य प्राप्तीको सुनिश्चितता गर्न उपप्रधानमन्त्री खड्काले आग्रह गरेको उनको सचिवालयले जनाएको छ।
याेजना आयाेगका उपाध्यक्ष मीनबहादुर श्रेष्ठ र पदाधिकारीले आवधिक याेजनाकाे तयारीबारे खड्कालाई जानकारी गराएका थिए।
