राष्ट्रपति रामचन्द्र पौडेलले पूर्वब्रिटिस गोर्खाका गुनासाहरू सम्बोधनका लागि कुटनीति तहमा भइरहेको छलफल बेलायतको उदारता र सद्भावबाट छिट्टै टुंगिने विश्वास लिएका छन्।
बेलायती सेनाका रथी तथा गोर्खा विग्रेडका कर्णेल कमाण्डेन्ट रिचार्ड वार्डलो ओविईसहित टोलीसँग शुक्रबार भएको भेटमा राष्ट्रपति पौडेलले विश्वमा शान्ति, स्थिरता र स्वतन्त्रता कायम गर्नु नेपाल र बेलायतको साझा उद्देश्य भएको बताएका हुन्।
उनले एकले अर्कालाई सहयोग गरेर अगाडि बढ्नुपर्ने बताए।
गोर्खा रेजिमेन्ट नेपाल र बेलायतको सम्बन्धको सेतु भएको बताउँदै उनले पूर्वब्रिटिस गोर्खाका गुनासाहरू सम्बोधनका लागि कुटनीति तहमा भइरहेको छलफलमा संयुक्त अधिराज्य बेलायतले उदारता र सद्भावबाट छिटो टुंगोमा पुग्ने बताए।
राष्ट्रपति पौडेलले जलवायु परिवर्तनको मुद्दा विश्वको प्रमुख चिन्ताको विषय बनेकाले यसमा मिलेर काम गर्नुपर्ने बताए।
वार्डलोले प्रतिवेदन पेश गर्दै गोर्खाली सेनाको व्यवसायीकता, समर्पण र क्षामतालाई बेलायतले मात्र नभई संसारले सम्मान र प्रशंसा गरेको बताए।
प्रतिवेदनमा सन् २०२३ लाई फर्केर हेर्दा विग्रेड अफ गोर्खाजले विश्वलाई सुरक्षित स्थान बनाउन आफ्नो महत्वपूर्ण भूमिका निर्वाह गरेको तथा अन्तराष्ट्रिय अनिश्चितताका बाबजुद पनि गोर्खाहरूको प्रतिष्ठा र प्रभावकारिता कायम रहेको उल्लेख छ।
सो अवसरमा बेलायती राजदूत रोब फेन पनि सहभागी थिए।
