चिनियाँ कम्युनिष्ट पार्टीकी विदेश विभाग उपप्रमुख सुन हैयान नेपाल आएकी छन्।
तीन दिने नेपाल भ्रमणका लागि उनी शुक्रबार दिउँसो काठमाडौं आइपुगेकी हुन्।
हैयानलाई स्वागत गर्न नेकपा (माओवादी केन्द्र) की उपाध्यक्ष पम्फा भुसाल र सचिव गणेश साह अन्तर्राष्ट्रिय विमानस्थल पुगेका थिए।
माओवादीको निमन्त्रणामा हैयान नेपाल आएको उपाध्यक्ष भुसालले सेतोपाटीलाई जानकारी दिइन्।
हैयानले काठमाडौंमा रहँदा उच्चस्तरीय राजनीतिक भेटघाट गर्ने कार्यक्रम छ।
उनले प्रधानमन्त्री पुष्पकमल दाहाल 'प्रचण्ड', नेपाली कांग्रेसका सभापति शेरबहादुर देउवा, नेकपा (एमाले) का अध्यक्ष केपी शर्मा ओली, राष्ट्रिय स्वतन्त्र पार्टीका सभापति रवि लामिछाने लगायतसँग भेटघाट गर्ने कार्यक्रम छ।
उनले नेपालका सबै राजनीतिक दलहरूसँग आइतबार सामूहिक अन्तर्क्रिया गर्ने कार्यक्रमसमेत रहेको छ।
