चिनियाँ कम्युनिस्ट पार्टी (सिपीसी) की अन्तर्राष्ट्रिय विभाग उपमन्त्री सुन हायानले नेपाल-चीनको सम्बन्धमा अन्य मुलुकले खेल्न खोजेको बताएकी छन्।
तीन दिने भ्रमणका क्रममा काठमाडौं रहेकी सुनले आइतबार विभिन्न राजनीतिक दलका नेताहरू सँग अन्तर्क्रिया गरेकी थिइन्।
‘उनीहरू आउँछन् र जान्छन्, त्यसले असर गर्ने भनेको नेपाल र चीनका जनतालाई नै हो,’ उनले भनिन्, ‘त्यसैले यसको लक्ष्य निर्दिष्ट गरेर अघि बढ्न जरुरी छ। कठिनाइको सामना गर्न मिलेर काम गर्नुपर्छ, सहकार्यलाई अझ व्यवहारिक बनाउनुपर्छ।’
उनले नेपाल भ्रमणमा आएर राजनीतिक दलसँग संयुक्त परामर्श गर्नुको कारण दुई देशबीचको सम्बन्धलाई सुमधुर बनाउनु रहेको बताइन्।
उपमन्त्री सुनले दुवै देशका राष्ट्राध्यक्षले सम्बन्धलाई सुदृढीकरण गर्न प्रयासरत रहेको भन्दै सहमति र समझदारी पत्रमा भएको हस्ताक्षरले पनि दुई देश बीचको सम्बन्ध प्रगाढ बनाएको बताइन् ।
‘मैले यसपटक सीपीसीको तर्फबाट धेरै भेटघाट गरें। हाम्रो राजदूतले पनि धेरै मेहनत साथ काम गरिराख्नु भएको छ,’ उनले भनिन्, ‘नयाँ युगमा चीन-नेपाल सम्बन्धलाई कसरी राम्रो बनाउने र सहकार्य गर्न भन्नेमा हामीले काम गर्न जरुरी छ।’
उनले नयाँ परिस्थितिमा नेपाल-चीन सम्बन्ध कस्तो बनाउने र त्यसमा राजनीतिक दलको भूमिका कस्तो हुने भन्ने विषयमा पनि गृहकार्य गर्नुपर्ने बताइन्।
