नेकपा (एकीकृत समाजवादी) ले महाधिवेशन प्रतिनिधि बन्न पार्टी अध्यक्षदेखि नै चुनिएर आउनुपर्ने निर्णय गरेको छ।
सोमबार सकिएको केन्द्रीय परिषद्को दोस्रो बैठकले केन्द्रीय अध्यक्षदेखि, केन्द्रीय निकायका सदस्यहरू पनि चुनिएर आउनुपर्ने निर्णय गरेको सम्मानित नेता झलनाथ खनालले जानकारी दिए।
‘नवौं महाधिवेशनमा हामीले यो व्यवस्था गरेका थिएनौं। त्यहाँबाट विद्रोह गरेर नयाँ केन्द्रीय कमिटी र निकाय बनाएकाले तलैबाट चुनिएर आऊँ भन्ने तलको प्रस्तावलाई निर्णयमा बदलेका छौं,’ खनालले भने।
त्यस्तै केन्द्रीय कमिटीमा ४० वर्षमुनिका २० प्रतिशत युवाको प्रतिनिधित्व सुनिश्चित गरिएको एक केन्द्रीय सदस्यले जानकारी दिए।
‘कार्यकारी कमिटीमा ७० वर्षे उमेरहदको प्रबन्ध गरिएको छैन। तर केन्द्रीय कमिटीमा ४० वर्षमुनिका युवा २० प्रतिशत रहने प्रबन्ध गरिएको छ,’ उनले भने।
आइतबारबाट सुरू भएको परिषद् बैठकमा विधान संशोधन प्रस्तावमाथि छलफल भएको थियो।
काठमाडौंको कमलादीस्थित प्रज्ञा भवनमा जारी बैठक सोमबार सकिँदैछ।
परिषद् बैठकमा करिब एक हजार प्रतिनिधि छन्। केन्द्रीय कमिटी, केन्द्रीय निकाय, जन संगठनका पदाधिकारीका अलावा संघीय निर्वाचन क्षेत्रबाट एकजना महिला र एकजना पुरूष प्रतिनिधिका रूपमा बैठकमा सहभागी छन्।
दसवटा समूह बनाएर छलफल गरिएको थियो।
समूहबाट आएका सुझाव टिपोट गर्न उपाध्यक्ष बेदुराम भुसालको नेतृत्वमा कमिटी बनाइएको थियो।
एकीकृत समाजवादीले यसअघि सचिवालय र केन्द्रीय कमिटी बैठक राखेर विधान मस्यौदामाथि छलफल गरिसकेको छ।
पार्टीले विधानको मस्यौदा तयार पार्न पार्टी उपाध्यक्ष भुसालको नेतृत्वमा समिति पनि बनाएको थियो। महासचिव घनश्याम भूसाल र उपमहासचिव प्रकाश ज्वाला रहेको समितिले तयार पारेको विधान मस्यौदामा सचिवालय सदस्यहरूले आ—आफ्ना धारणा राखेका थिए।
सचिवालय सदस्यहरूले केन्द्रीय कमिटीको आकार घटाउनुपर्ने बताएका थिए। त्यस्तै पार्टीको कार्यकारी कमिटीमा उमेरहदको व्यवस्था गर्नुनपर्ने, युवादेखि वृद्धसम्मलाई प्रतिशत छुट्टयाएर प्रतिनिधित्व गराइनुपर्ने राय राखेका थिए। त्यस्तै केन्द्रीय कमिटी र आयोगका सदस्यहरू भूगोलबाट महाधिवेशन प्रतिनिधि निर्वाचित भएर आउनुपर्ने धारणा पनि सचिवालय सदस्यहरूले राखेका थिए।
एकीकृत समाजवादीले केन्द्रीय कमिटी सदस्यहरूलाई ११ वटा प्रश्न नै बनाएर विधानमाथि सुझाव मागेको थियो।
प्रश्नावलीमा उमेरहद राख्नुपर्ने/नपर्ने, महाधिवेशनमा केन्द्री कमिटी र केन्द्रीय आयोग सदस्यहरू स्वतः प्रतिनिधि हुने कि, निर्वाचित भएर आउनुपर्ने? केन्द्रीय कमिटीको आकार कस्तो हुने? लगायत प्रश्नमा सुझाव मागेको थियो।
एकीकृत समाजवादीले आगामी जेठ ३ गतेदेखि पहिलो राष्ट्रिय महाधिवेशन गर्दैछ। त्यसैका लागि विधानमाथि छलफल गराइरहेको हो।
