जनता समाजवादी पार्टी (जसपा) ले गठबन्धन बैठकमा पार्टीका तर्फबाट मन्त्री हुनेहरूको नाम दिएको छैन।
अध्यक्ष उपेन्द्र यादव बालुवाटारमा बुधबार दिउँसो भएको गठबन्धन बैठकमा सहभागी थिए। अन्य दलहरूले मन्त्रालय र मन्त्री हुनेको नाम दिए पनि जसपाले नाम दिएको छैन।
यो पनि: मन्त्रालय भागबन्डामा सहमति: कुन दलबाट को मन्त्री?
अध्यक्ष यादवले मन्त्रालय भागबण्डाबारे अहिलेसम्म कुनै पनि सहमति नभएको प्रतिक्रिया दिएका छन्।
‘हामीले छलफल गर्यौं, तर कुरा सबै विषयमा अड्किएको छ। अस्ति भएको ८ बुँदे सहमतिबाहेक अहिलेसम्म कुनै सहमति भएको छैन,’ अध्यक्ष यादवले सेतोपाटीसँग भने।
उनले फेरि गठबन्धन बैठक बसेर सहमति गरी अघि बढ्ने बताए।
बुधबार बिहान बसेको जसपा बैठक सरकारमा जाने वा नजाने विषयमा अनिर्णीत भएको थियो।
गत सोमबार बनेको नयाँ गठबन्धनमा जसपा पनि सहभागी छ। तर सोमबार एमाले, माओवादी र रास्वपाले एक-एक मन्त्री बनाए पनि जसपाले मन्त्री पठाएको थिएन।
