सचिवालय बैठकलगत्तै नेकपा (एकीकृत समाजवादी) का अध्यक्ष माधवकुमार नेपाल प्रधानमन्त्री पुष्पकमल दाहाल 'प्रचण्ड' लाई भेट्न बालुवाटार गएका छन्।
आलोकनगरमा बुधबार बसेको सचिवालय बैठकले प्रधानमन्त्री दाहालसँग छलफल गर्न अध्यक्ष नेपाल, उपाध्यक्ष प्रमेश हमाल र महासचिव घनश्याम भूसाललाई जिम्मेवारी दिने निर्णय गरेको थियो।
प्रवक्ता जगन्नाथ खतिवडाले अध्यक्षसहित नेताहरू प्रधानमन्त्री दाहालसँग वार्ता गर्न बालुवाटार गएको जानकारी दिए। प्रधानमन्त्रीसँग विभिन्न विषयमा छलफल गरेपछि प्राप्त हुने जवाफका आधारमा थप निर्णय लिइने उनले बताए।
प्रधानमन्त्री दाहालले नयाँ समीकरणमा आउन प्रस्ताव गरेको विषयमा सचिवालय बैठकमा छलफल भएको थियो। उक्त प्रस्तावलाई सकारात्मक रूपमा लिइएको प्रवक्ता खतिवडाले बताए।
‘प्रधानमन्त्रीले नयाँ समीकरणको आरम्भ गरेपछि हाम्रो पार्टीसँग नयाँ समीकरणमा सरकारको गठन र सञ्चालन तथा नीति कार्यक्रममा नेकपा एकीकृत समाजवादीको समान सहभागीता र भूमिका रहने प्रस्ताव गर्नुभएको सन्दर्भमा बैठकमा छलफल भयो,’ सचिवालय बैठकका निर्णय सुनाउँदै उनले भने, ‘उक्त प्रस्तावलाई सकारात्मक रूपले लिँदै प्रधानमन्त्रीसँग छलफल गरेपछि आवश्यक निर्णय गरिनेछ।’
एकीकृत समाजवादीले निम्न विषयमा प्रधानमन्त्रीसँग छलफल गर्ने भएको छ:
१. देशको आर्थिक संकटको समाधान गर्दै उत्पादन वृद्धि र रोजगारी सिर्जना गर्ने विषयमा
२. राष्ट्रहितको रक्षा र संवर्द्धन गर्ने विषयमा
३. भ्रष्टाचारको अन्त्य र सुशासन स्थापना गर्ने विषयमा
४. महँगी नियन्त्रणलगायत जनताका समस्या समाधानका विषय
५. सन्तुलित परराष्ट्र सम्बन्ध कायम गर्ने विषयमा
