निवर्तमान उपप्रधान तथा गृहमन्त्री नारायणकाजी श्रेष्ठले गृह मन्त्रालयमा नयाँ मन्त्री आउँदा मिटरब्याज पीडितलाई न्याय दिने प्रक्रियालाई निरन्तरता दिन आग्रह गरेका छन्।
बुधबार उनको बिदाइमा गृह मन्त्रालयले गरेको कार्यक्रममा बोल्दै श्रेष्ठले आफ्नो कार्यकालमा मिटर ब्याज पीडितलाई न्याय दिने प्रक्रिया जोडतोडले अघि बढेको बताउँदै नयाँ आउने गृहमन्त्रीले त्यसलाई निरन्तरता दिनुपर्ने बताएका हुन्।
उनले मिटरब्याज पीडितलाई न्याय दिन आयोग बनाएकोदेखि कानुन निर्माण गरी सिडिओ अफिसमा सहजीकरण समिति बनाएको बताए।
आयोगको विघटन भएपछि फेरि जिल्ला प्रहरी कार्यालयमा सबै उजुरीहरू पठाएर स्वेच्छिक मेलमिलापको प्रक्रियामा लैजाने र थप अनुसन्धान गर्नुपर्ने भए अनुसन्धान गरेर अभियोजनमा लैजाने गरी अघि बढाएको श्रेष्ठले बताए।
त्यसरी एक महिनाभित्र तीन हजारभन्दा बढी मिटरब्याज पीडितले न्याय पाएको बताए।
मिटरब्याज पीडितलाई न्याय दिने काममा राम्रो भूमिका ननिभाउने प्रमुख जिल्ला अधिकारी र प्रहरीलाई पनि सरूवा गरिएको पनि श्रेष्ठले बताए।
‘यसलाई ध्यान दिइयोस्। एउटा मन्त्री गएर अर्को मन्त्री आउँदा यो प्रक्रिया कमजोर नहोस्। पीडितलाई न्याय दिने काम यो राज्यको अभिभारा हो। त्यसकारण यो कामलाई फत्ते गर्ने पर्छ र निरन्तर रूपमा अगाडि बढाउनुपर्छ,’ उनले भने।
