प्रधानमन्त्री पुष्पकमल दाहाल 'प्रचण्ड'ले पछिल्लो गठबन्धनलाई 'गठबन्धन' नभनेर 'सहयात्रा' भन्नुपर्ने बताएका छन्।
शनिबार माओवादी केन्द्रको संसदीय दलको बैठकमा प्रधानमन्त्री प्रचण्डले पछिल्लो राजनीतिक घटनाक्रम र एमालेका अध्यक्ष केपी शर्मा ओलीसँग भएको छलफल र भेटघाटबारे ब्रिफिङ गरेका थिए।
सो क्रममा प्रधानमन्त्री प्रचण्डले आफू र एमाले अध्यक्ष ओलीबीच पनि 'गठबन्धन'को सट्टा 'सहयात्रा' भन्नुपर्ने विषयमा कुराकानी भएको बताएका थिए।
‘गठबन्धन भन्ने भाष्य अलि राम्रो भएन। खाली सत्ता बनाउन र भत्काउन मात्रै प्रयोग भएझै देखियो,’ प्रधानमन्त्री प्रचण्डले भने,‘सहयात्रा भन्दा यसलाई दीर्घकालीन रूपमा लैजानेगरी सोच्न सकिने भइयो। यो सहयात्रालाई पहिले बाम ध्रुविकरण र आउँदो चुनावसम्म पार्टी एकताको चरणसम्म लैजान सकिन्छ कि भन्ने हिसाबले कुरा अघि बढेको छ।’
प्रधानमन्त्री प्रचण्डले एक वर्षमा तीनपटक गठबन्धन बदलेको भन्दै आलोचना भइरहेको सन्दर्भमा उनले यस्तो प्रस्ताव अघि सारेका हुन्।
०७९ को निर्वाचनमा कांग्रेसहितको गठबन्धन गरेका प्रचण्डले गत वर्ष पुसमा सरकार बनाउँदा एमालेसहितका नेताहरूको साथ लिएका थिए।
दुई महिनापछि फेरि पुरानै गठबन्धनको सरकारमा फर्किएका प्रचण्डले अहिले फेरि एमालेसहितका दलहरूको समर्थनमा सरकारको नेतृत्व गरिरहेका छन्।
-1706444810.jpg)
