नेपाली कांग्रेसले राष्ट्रिय सभा अध्यक्ष पदमा उम्मेदवारी दिने भएको छ।
यही फागुन २९ गते हुने निर्वाचनका लागि राष्ट्रिय सभा सांसद युवराज शर्मालाई उम्मेदवार बनाउने निर्णय भएको महामन्त्री गगन थापाले सेतोपाटीलाई जानकारी दिए।
सभापति शेरबहादुर देउवाको निवास बूढानिलकण्ठमा आइतबार अपराह्न बसेको संसदीय दल कार्यसमिति बैठकले लुम्बिनी प्रदेशबाट राष्ट्रिय सभा सदस्य रहेका शर्मालाई उम्मेदवार बनाउने निर्णय गरेको हो।
७३ वर्षीय शर्मा कांग्रेस बाँकेका पूर्वसभापति हुन्। उनी २०७८ माघमा भएको राष्ट्रिय सभा चुनावबाट राष्ट्रिय सभा सदस्य निर्वाचित भएका थिए।
राष्ट्रिय सभामा कांग्रेसका १६ जना सांसद छन्।
राष्ट्रिय सभा अध्यक्ष चुनावका लागि सोमबार मनोनयन दर्ताको कार्यक्रम छ।
राष्ट्रिय सभा अध्यक्ष पदका लागि यसअघि पूर्वमहामन्त्री कृष्णप्रसाद सिटौला आकांक्षी थिए। उनलाई सभापति देउवाले शनिबार राष्ट्रिय सभा दल नेता मनोनीत गरेका थिए। सत्ता गठबन्धन परिवर्तन भएसँगै सिटौला राष्ट्रिय सभा अध्यक्ष पदका लागि उम्मेदवार भएनन्।
यो पनि: प्रधानमन्त्रीलाई भेटेर सिटौलाले भने- हामीमाथि धोकाधडी भयो, सजिलो गरी चल्छ भन्ने नसोच्नुहोला
