नेपाली कांग्रेसका केन्द्रीय सदस्य प्रदीप पौडेलले कांग्रेस सरकार बनाउने खेलमा लाग्न नहुने बताएका छन्।
काठमाडौंको सुकेधारामा आइतबार भएको शिक्षक संघ बागमती प्रदेशको अधिवेशनमा बोल्दै उनले कांग्रेस रचनात्मक प्रतिपक्षीको भूमिका खेल्दै जनताका कुरा खरो ढंगले उठाउने पनि बताए।
‘कांग्रेस भ्यागुताको धार्नी पुर्याउन लाग्न हुन्न, कांग्रेसले रचनात्मक भएर प्रतिपक्षी भूमिका निर्वाह गर्नुपर्दछ, देश र जनताको पक्षमा खरो रुपमा प्रस्तुत हुनुपर्दछ', पौडेलले भने।
उनले कांग्रेसले एमालेसँग सहकार्य गर्न लागेको हल्ला चलेको पनि बताए। ‘यो हल्ला मात्रै हो, कांग्रेसले अहिले नै हतार गर्न हुँदैन,’ उनले भने।
सुशासन कायम गरे मात्रै जनताको विश्वास जित्न सकिने उनको भनाइ छ।
‘दुई ठूला पार्टी मिल्दा स्थिरता त कायम हुन्छ तर स्थिरताले मात्रै पुग्दैन। अहिले देशलाई ठूलो आर्थिक तथा प्रशासनिक व्ययभार थपिएको छ। यसलाई घटाउनु आजको प्रमुख आवश्यकता यो हो,’ उनले भने।
यदि कांग्रेस र एमाले मिल्ने हो भने संविधान संशोधन गर्ने सहमति गरेर संघ तथा प्रदेशका सांसदको संख्या र मन्त्रालयको संख्या घटाउने, स्थानीय तहको संख्या नै घटाउने र वडाकाे संख्या बढाउने गरी सम्झौता गर्न सक्नुपर्ने उनले बताए।
चुनावअघि गठबन्धन नगर्न संवैधानिक रूपमै व्यवस्था गर्नु पर्ने उनले बताए।
