सत्ता गठबन्धनमा रहेको पाँच दलबीच मंगलबार नयाँ सहमति भएको छ।
राष्ट्रिय सभा अध्यक्ष निर्वाचनको पूर्वसन्ध्यामा नेकपा (एमाले), माओवादी केन्द्र, राष्ट्रिय स्वतन्त्र पार्टी, जनता समाजवादी पार्टी र एकीकृत समाजवादीबीच सात बुँदे सहमति भएको हो।
यसअघि गत फागुन २१ गते चार दलबीच ८ बुँदे सहमति भएको थियो। त्यसबेला एकीकृत समाजवादी गठबन्धनमा सामेल थिएन। एकीकृत समाजवादीलाई गठबन्धनमा ल्याएपछि बसेको बैठकले फागुन २१ को ८ बुँदे सहमतिलाई पुनर्लेखन गरेको हो।
पुनर्लेखन गरिएको सात बुँदे सहमतिमा राष्ट्रिय सभा उपाध्यक्ष कसले पाउने भन्ने उल्लेख छैन। तर फागुन २१ को चार दलीय गठबन्धनको सहमतिको दोस्रो बुँदामा भने राष्ट्रिय सभा उपाध्यक्ष नेकपा एमालेले पाउने उल्लेख थियो।
यस्तो थियो सहमति:
मंगलबार बिहान प्रधानमन्त्री पुष्पकमल दाहाल ‘प्रचण्ड’, एमाले अध्यक्ष केपी शर्मा ओली र माधवकुमार नेपालबीच छलफल भएपछि सात बुँदे सहमति भएको हो।
‘पूर्व समझदारीअनुसार आठ बुँदेलाई पुनर्लेखन गरिएको हो,’ एकीकृत समाजवादीका महासचिव घनश्याम भूसालले भने, ‘आज त्यही सहमति पुनर्लेखन गरेर समझदारी कायम गर्ने काम भयो। बाँकी विषयहरूमा आज प्रवेश गरिएन।’
एकीकृत समाजवादीका एक नेताले जानकारी दिएअनुसार यसअघिका भेटमा पार्टी अध्यक्ष नेपालले प्रधानमन्त्रीको बाँकी कार्यकाल आफूले पनि नेतृत्व गर्न पाउनुपर्ने अडान राखेका थिए। नेपाली कांग्रेससँगका गठबन्धनमा १८ महिना सरकारको नेतृत्व गर्न पाउन समझदारी रहेको बताउँदै यो गठबन्धनअनुसार कम्तीमा एक वर्ष सरकारको नेतृत्व गर्न पाउनुपर्ने उनको रटान थियो।
त्यही भएर सोमबार बसेको एकीकृत समाजवादीको संसदीय दलको बैठकले पनि प्रधानमन्त्री प्रचण्डसँग लिखित सहमति नगरी विश्वासको मत दिनु औचित्यपूर्ण नहुने निष्कर्ष निकालेको थियो।
आज बिहान सहमति हुँदा विगतको सहमतिको दुई नम्बर बुँदा संशोधन गरिएको छ।
यो पनि: सत्ता गठबन्धनका ५ दलबीच ७ बुँदे सहमति