नेकपा (एमाले) का अध्यक्ष केपी शर्मा ओलीले राजनीतिक अस्थिरताको सुरूआत नेपाली कांग्रेसले गरेको बताएका छन्।
प्रधानमन्त्री पुष्पकमल दाहाल ‘प्रचण्ड’ को विश्वासको मतको प्रस्तावको समर्थन गर्दै कांग्रेसले अरूलाई अस्थिरता निम्त्याएको आरोप लगाउन नमिल्ने बताएका हुन्।
‘मैले २०७३ साल साउन यसै रोस्ट्रमबाट भनेको थिएँ। अस्ति उद्धरण नभनी तर उद्धरण जस्तै गरेर भन्नुभयो– नयाँ समीकरणमा आएका मित्रहरूलाई होस् रहोस्। मैले त्यतिबेलै भनेको थिएँ,’ उनले भने, ‘संविधान जारी गरेपछि हामीले नै नेपाली कांग्रेसलाई दुई–चार सिट बढी भएको नाताले प्राथमिकता पाउनुपर्छ भनेको थिएँ। त्यतिबेला लिखित सहमति भएको थिएन। तर संविधान जारी भएपछि नेपाली कांग्रेस आफैं उम्मेदवार बन्यो।’
उनले कांग्रेसले धाकका साथ इमानको कुरा गर्न नमिल्ने बताए।
‘कांग्रेस वाचाबन्धनमा अडिएको, इमानै इमानको खानी, बेइमानी भनेको थाहै नपाएजस्तो प्रस्तुति सुन्दा आश्चर्य लाग्यो,’ उनले भने, ‘अस्थिरताको खेती यहाँहरूले गर्नुभएको हो। पोहोर दुई महिनामा सरकार परिवर्तन गर्दा तपाईंहरूलाई अस्थिरता लागेन।अहिले १४ महिनापछि सरकार परिवर्तन हुँदा केको अस्थिरता? पोहोर त भएको थिएन त, तपाईंहरूले अस्थिरता नगरिकन, शान्तिपूर्ण ढंगले सरकार परिवर्तन गरेको होइन!’
--1715160207.JPG)
