नागरिक उन्मुक्ति पार्टी (नाउपा)ले प्रधानमन्त्री पुष्पकमल दाहाल 'प्रचण्ड'लाई विश्वासको मत दिने भएको छ।
बुधबार प्रतिनिधि सभामा प्रधानमन्त्री प्रचण्डले राखेको विश्वासको प्रस्तावमाथिको छलफलमा बोल्दै नाउपाका अध्यक्ष समेत रहेकी रञ्जिता श्रेष्ठले प्रधानमन्त्री प्रचण्डलाई विश्वासको मत दिने बताएकी हुन्।
उनी र संरक्षक रेशम चौधरीले सरकारलाई विश्वासको मत दिने/नदिनेबारे छुट्टाछुट्टै विज्ञप्ति जारी भएका थिए।
रञ्जिताले विश्वासको मत दिन ह्विव जारी गरेकी थिइन्। यता चौधरी पक्षको तर्फबाट पार्टी उपाध्यक्ष दामोदर पण्डितले विश्वासको मत नदिन र प्रतिपक्षमा बस्न भन्दै विज्ञप्ति निकालेका थिए।
त्यसैबीच संसदमा विश्वासको मत दिने/नदिने भन्ने विषयमा छलफल गर्नेक्रममा रञ्जिताले प्रधानमन्त्री प्रचण्डलाई विश्वासको मत दिने जानकारी दिएकी हुन्।
‘प्रधानमन्त्री पुष्पकमल दाहाल प्रचण्डले विश्वासको मत छ भनि पेस गर्नुभएको प्रस्तावमा नागरिक उन्मुक्ति पार्टीको समर्थन रहेको जानकारी गराउन चाहन्छु,’ उनले भनिन्।
उनले एकीकृत समाजवादीको भनाइलाई खण्डन गर्दै संसदमा साना दलको पनि भूमिका महत्त्वपूर्ण हुने बताइन्।
‘म भन्दा अगाडि बोल्नुभएको माननीय राजेन्द्रजीको कुरालाई गहन रूपमा सुने, बारम्बार उहाँले ‘सानो पार्टी’ ‘सानो पार्टी’ भन्दा मलाई मैले कक्षा ८ मा एउटा परीक्षा दिएको याद आयो। परीक्षा दिँदा लामा प्रश्न र छोटा प्रश्नहरू थिए। मैले छोटा प्रश्नका उत्तरहरू छाडेर लामा प्रश्नका मात्रै उत्तर दिएर फर्किएकी थिएँ। रिजल्टको दिन मेरो पास मार्क पनि आएन,’ उनले भनिन्।
-1710320682.jpeg)
