सत्तारूढ नेकपा एमालेका सांसद रघुजी पन्तले नदीजन्य निर्माण सामग्री निर्यात गर्नेगरी विधेयक ल्याउन नहुने बताएका छन्।
बिहीबार प्रतिनिधि सभामा प्रस्तुत भएको निर्माणमुखी सामग्री व्यवस्थापन तथा नियमन विधेयकबारे छलफलमा बोल्दै उनले बालुवा, रोडा ढुंगा लगायतका नदीजन्य पदार्थ नेपालकै विकासका लागि उपयोग गर्नुपर्ने बताएका हुन्।
‘नेपाल आफैं विकासोन्मुख देश हो। म्यासिभ रूपमा यसले निर्माण गर्नुपर्छ अनेकौं बाटाघाटा बाँध जलस्रोतका त्यत्रा योजना बनाउनुछ। त्यो बेला चाहिन्छ,’ उनले भने, ‘केही नाफाका लागि भटाभट निकासी गर्ने छुट दियौं भने भोलि आफूलाई चाहिएको बेला यो सामग्री पाउँदैनौं र यसको विकल्प हामीसँग हुँदैन।’
उनले सही ढंगले प्रयोग गर्दा प्राकृतिक स्रोत निरन्तर पाइरहने तर बेठीक ढंगले प्रयोग गर्दा भने समाप्त भएर जाने र फेरि उत्पादन गर्न नसकिने बताए।
‘विधेयकको दफा ४२ मा सरकारले चाह्यो भने निकासीमा रोक लगाउने भन्ने दफा छ। सर्वोच्च अदालतले अहिले रोकिराख भनेको विषयमा कानुन ल्याउन उपयुक्त हुँदैन,’ उनले भने।
पन्तले बर्सेनि निकासीको कुरा आउनु छिमेकी मुलुकको दबाब हो की भन्ने शंका समेत व्यक्त गरे।
‘यो विषय पटकपटक आउँछ कतै छिमकीको दबाब हो कि!,’ उनले भने, ‘ किन भने त्यहाँ म्यासिभ रूपले निर्माण भइरहेको छ र उनीहरूलाई चाहिएको छ।’
उनले अमेरिकाले आफ्नो देशको जोगाएर अरबबाट पेट्रोलियम पदार्थ आयात गर्ने उदाहरण प्रस्तुत गर्दै नेपालले पनि प्रकृतिजन्य पदार्थलाई नेपालकै विकासका लागि प्रयोग गर्नुपर्ने बताए।
‘निकासी सम्बन्धी कन्सेप्ट विधेयकमा राख्नुहुन्न,’ उनले भने।