नेकपा (माओवादी केन्द्र) का सांसद जनार्दन शर्माले स्रोत, साधनहरुको व्यवस्थापन गर्न नसक्दा अर्थतन्त्र संकुचनमा परेको बताएका छन्।
प्रतिनिधि सभाको बिहीबारको बैठकमा बोल्दै सांसद शर्माले पर्याप्त स्रोत, साधनहरुको व्यवस्थापन गर्न नजान्दा अर्थतन्त्र संकुचनमा परेको बताए।
स्रोत, साधनहरुको सही परिचालन, सही उपभोग र सही व्यवस्थापन गर्न नसक्दा अर्थतन्त्रमा समस्या आएको उनको दाबी थियो।
अर्थतन्त्रमा समस्या आउनुको कारण संरचनागत कमजोरी र संस्थागत असक्षमता भएको उनले बताए। संरचना र संस्थाहरु बलियो बनाउन सके परिणाम निस्कने उनले दाबी गरेका छन्।
‘अर्थतन्त्रको चुनौतीलाई सामना गर्दै नेपालको द्रुततर आर्थिक विकास कसरी सम्भव छ भन्ने प्रश्न नै हो। त्यसकारण हामीसँग भएका पर्याप्त स्रोत, साधन हाम्रो व्यवस्थापकिय कला, क्षमता र हाम्रा कार्यान्वयनका अदक्षताका कारणले आज हामी गरिब, हाम्रो अर्थतन्त्र संकुचनमा पर्नुपरेको कारण हो नै। यद्यपी कोभिड लगायतका विश्वमा चलेका द्वन्दका प्रभाव पनि आफ्नो ठाउँमा छन्,’ उनले भने, ‘तर त्यसको बाबजुद पनि पर्याप्त स्रोत, साधनहरुको सही परिचालन, सही उपभोग, सही व्यवस्थापन गर्ने हाम्रो संरचनागत कमजोरी, हाम्रा संस्थागत असक्षमताका कारणले नै आज हामी समस्याग्रस्त छौं।’
देशलाई समृद्ध बनाउनका लागि १० वटा एजेन्डामा राष्ट्रिय सहमति गर्नुपर्ने उनले बताए। एकले ल्याएको नीति र बजेट अर्कोले काट्ने गलत परम्पराबाट देश अगाडि बढ्न नसक्ने उनले बताए। राष्ट्रिय सहमतिका साथ अगाडि बढ्ने हो भने देशको समृद्धि सम्भव भएको उनको भनाइ छ।
अर्थतन्त्रमा देखिएका चुनौतिको समाधान हुने गरी संसदमा छलफल गरेर बजेटको सिद्धान्त र प्राथमिकता परिमार्जन गर्नुपर्ने उनले बताए।
(न्युज एजेन्सी नेपाल)
-1707291223.jpg)
