राष्ट्रिय स्वतन्त्र पार्टीका सांसद स्वर्णिम वाग्ले आगामी आर्थिक वर्षको बजेट ल्याउँदा वस्तुगत धरातलमा आधारित भएर ल्याउन अर्थमन्त्री वर्षमान पुनलाई सुझाव दिएका छन्।
प्रतिनिधि सभाको बिहीबारको बैठकमा बजेटका प्राथामिकता र सिद्धान्तमाथि छलफलमा भाग लिँदै वाग्लले पछिल्लो समय मुलुकको सार्वजनिक वित्तमा संकट देखिएको भन्दै त्यो विषयमा सरकार गम्भीर हुन आवश्यक रहेको बताए।
वाग्लले चालु आर्थिक वर्षको ८ महिनाको वित्तीय अवस्था दयनिय रहेको बताए। चालु आर्थिक वर्षको ८ महिना ८ खर्ब खर्च रहेको भन्दै चालु खर्च ५ खर्ब ८२ अर्ब, पुँजीगत खर्च ८१ अर्ब र वित्तीय व्यवस्थापन १ खर्ब ३८ अर्ब रहेको बताए।
राजश्व संकलन ६ खर्ब ३९ अर्ब रुपैयाँ रहेको भन्दै लक्ष्य पूरा गर्न नसक्ने अवस्थामा रहेको उनको भनाइ छ।
निवर्तमान अर्थमन्त्री प्रकाशशरण महत ८ महिनामा बजेट कार्यान्वयन गर्न नसक्ने असफल अर्थमन्त्रीका रुपमा प्रस्तुत भएको उनले आरोप लगाएका छन्।
गत वर्ष आफूले अर्थमन्त्रीलाई भनेका कुरा सत्य सावित भएको उनको भनाइ थियो।
‘चालु आर्थिक वर्षको ८ महिनाको वित्तीय अवस्था दयनिय छ। १७ खर्ब ५१ अर्बको बजेटलाई अर्धवार्षिक समीक्षामा २ खर्ब घटाएर १५ खर्ब ३० करोडमा ल्याउनु भयो। खर्च हेर्दा ८ खर्ब खर्च गरेका छौं। चालु खर्च ५ खर्ब ८२ अर्ब र पुँजीगत खर्च ८१ अर्ब छ। वित्तीय व्यवस्थापन १ खर्ब ३८ अर्ब जति छ। राजश्व संकलन ६ खर्ब ३९ अर्ब रुपैयाँ छ। हिजोसम्मको ग्याप नै १ खर्ब ६० अर्बको छ,’ उनले भने, ‘अर्थतन्त्र भयावह छ। कुनै हालतमा सफल हुँदैन भन्दा सकिन्छ गर्छु भन्नु भएको थियो।’
उनले दिगो विकासका लक्ष्यसहित मुलुक निर्माणको स्पष्ट गन्तव्य तर्जुमा हुनुपर्ने बताए। औद्योगिकीकरण र हरित अर्थतन्त्रमा ध्यान दिँदै अर्थतन्त्रमा सुधारका लागि आँट र अठोट सरकारसँग हुनुपर्ने उनको भनाइ छ। बजेटको सिद्धान्त र प्राथमिकतालाई पुनःलेखन नगर्दा पनि हुने भन्दै नीति तथा कार्यक्रम र बजेट वास्तविक धरातलका आधारमा ल्याउन उनले सुझाव दिएका छन्।
(न्युज एजेन्सी नेपाल)
-1710315919.jpg)
