नेपाली कांग्रेसका केन्द्रीय सदस्य उदयशमशेर राणाले विवादमा परेका व्यक्तिलाई प्रधानमन्त्री पुष्पकमल दाहाल 'प्रचण्ड' ले उपप्रधान तथा गृहमन्त्री बनाएको बताएका छन्।
नेपाल तरूण दल रामेछापको जिल्ला सम्मेलनलाई शुक्रबार सम्बोधन गर्दै उनले ठूला विवादमा परेका व्यक्तिलाई गृहमन्त्री बनाउने काम भएको भन्दै विरोध गरेका छन्।
‘ठूला विवादमा परेको र प्रहरी छानबिनका क्रममा रहेका व्यक्तिलाई प्रधानमन्त्रीले गृहमन्त्री बनाउनुभयो,’ रास्वपा सभापतिसमेत रहेका गृहमन्त्री रवि लामिछानेप्रति लक्षित गर्दै उनले भने, ‘विवादित व्यक्तिलाई गृहमन्त्रीको जिम्मेवारी दिनु गलत हो।’
उनले प्रधानमन्त्री प्रचण्डले नयाँ गठबन्धन बनाएर आफ्नै पार्टीका नेता तथा कार्यकर्तालाई पनि धोका दिएको उनको भनाइ थियो।
गठबन्धन टुटेकोमा कांग्रेसको आपत्ति नरहेको उल्लेख गरेका उनले प्रधानमन्त्री दाहालमा राजनीतिक नैतिकता नरहेको पनि आरोप लगाए।
