राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनसहित नेताहरूले मधेस यात्रा गर्ने भएका छन्।
प्रवक्ता मोहन श्रेष्ठका अनुसार सोमबारदेखि यात्रा सुरू हुनेछ। चैत ८ गतेसम्म चल्ने यो अभियानमा राप्रपाका नेताहरू मधेसका जिल्लाहरूमा पुग्नेछन्।
मधेसका आठै जिल्लामा राप्रपाले आमसभा र कार्यकर्ता भेला गर्ने उनले बताए।
राप्रपाले प्रधानमन्त्री पुष्पकमल दाहाल 'प्रचण्ड' लाई भेटेर राष्ट्रियता, विकास, सुशासन, सेवाप्रवाह र जनजीविकासँग सम्बन्धित ४० बुँदे माग पत्र बुझाएको थियो।
राप्रपाले यही चैत २७ गते काठमाडौंकेन्द्रित जनप्रदर्शन पनि गर्दैछ।
‘पार्टीले अघि सारेका मागलाई जनतासम्म पुर्याउने र जनतालाई जागरूक तुल्याउँदै जनमत सिर्जना गर्न राप्रपा अध्यक्षसहित नेताहरूले मधेस यात्रा गर्न लागेको हो,’ प्रवक्ता श्रेष्ठले सेतोपाटीसँग भने।
यात्रामा अध्यक्ष लिङ्देन, वरिष्ठ उपाध्यक्षहरू बुद्धिमान तामाङ, रवीन्द्र मिश्र, महामन्त्री धवलशमशेर राणा, प्रवक्ता ज्ञानेन्द्र शाही, मधेस प्रदेश अध्यक्ष भरत गिरी, नेताहरू बिना जयसवाल, खुस्बु ओलीलगायत रहनेछन्।
चैत ५ गते जनकपुरस्थित जानकी मन्दिरमा पूजाआजा गरेर मधेस यात्रा सुरू गरिने प्रवक्ता श्रेष्ठ बताउँछन्। सोमबार धनुषामा अगुवा कार्यकर्ता भेला र सर्लाहीको बरहथवामा आमसभा हुने उनको भनाइ छ।
राप्रपाले चैत ६ गते रौतहटको गौरमा कार्यकर्ता भेला र पर्साको वीरगञ्जमा आमसभा हुनेछ भने साँझ वीरगञ्जका उद्योगी तथा व्यवसायीहरूसँग अन्तक्रिया गर्ने कार्यक्रम रहेको प्रवक्ता श्रेष्ठले जानकारी दिए।
चैत ७ गते बाराको निजगढमा आमसभा र बर्दिबासमा महोत्तरीको अगुवा कार्यकर्ता भेला हुनेछ।
चैत ८ गते सिराहाको लाहानमा कार्यकर्ता भेला हुनेछ भने सप्तरीको बोधेबसान नगरपालिकामा आमसभा गर्ने तय भएको उनले जानकारी दिए।
