प्रमुख प्रतिपक्षी दल नेपाली कांग्रेसका सांसद दिक्पाल कुमार शाहीले गृहमन्त्री रवि लामिछानेको राजीनामा माग गरेका छन्।
प्रतिनिधि सभाको सोमबार बसेको बैठकको शून्य समयमा बोल्दै सांसद शाहीले सहकारी ठगी प्रकरणमा लामिछानेको नाम जोडिएका कारण उनले पदबाट राजीनामा दिनुपर्ने बताएका हुन्।
‘सहकारीमा जनताले जम्मा गरेको पैसा नियमविपरीत गृह मन्त्रीज्यूले लिनुभएको र अनुसन्धान गर्ने तालुक मन्त्रालयमा आफैं बसेको आरोप छ,’ उनले भने, ‘पीडितलाई न्याय दिन र पीडकलाई कारबाही गर्न गृहमन्त्रीले राजीनामा गरी सहयोग गरिदिन माग गर्दछु।’
सांसद शाहीले गृहमन्त्रीले कांग्रेसलाई पढाउन इच्छा व्यक्त गरेको स्मरण गर्दै त्यतिबेला सहकारी ठग्न नसिकाउन पनि आग्रह गरेका छन्।
‘गृहमन्त्रीले नेपाली कांग्रेसलाई पढाउन खोज्नुभएको रहेछ। मेरो अनुरोध छ कांग्रेसलाई पढाउँदा डबल नागरिकता, डबल पासपोर्ट, सहकारी ठग्न र सुन तस्करीसँग साँठगाँठ गर्न नसिकाउनुहोला,’ उनले भने।
सांसद शाहीले सुन तस्करी तथा सहकारी ठगीबारे प्रधानमन्त्रीले जबाफ दिनुपर्ने बताए।
कांग्रेसले आफ्नो राजीनामा मागेपछि गृहमन्त्री लामिछानेले कांग्रेसलाई ९ मिनेट १८ सेकेन्ड पढाउने इच्छा रहेको बताएका थिए।
यो पनि: कांग्रेसले राजीनामा मागेपछि गृहमन्त्रीको प्रतिक्रिया- कति दिन मन्त्री हुन्छु थाहा छैन, डटेर काम गर्छु
