राष्ट्रिय प्रजातन्त्र पार्टीका अध्यक्ष राजेन्द्र लिङ्देनले गणतन्त्रको नाममा शासन गर्ने राजनीतिक दलहरू जनताको अग्नि परीक्षामा असफल भएको दाबी गरेका छन्।
सोमबार सर्लाहीको बरहथवामा आयोजित आमसभालाई सम्बोधन गर्दै अध्यक्ष लिङ्देनले उक्त दाबी गरेका हुन्।
अध्यक्ष लिङ्देनले मधेसले प्रधानमन्त्री बाहेक राष्ट्रपति, उपराष्ट्रपति, महत्वपूर्ण मन्त्रालय प्राप्त परिसक्दा पनि मधेसी जनताको जीवनस्तर सुधार गर्ने दिशामा कुनै काम नगरेको बताए।
‘सबै राजनीतिक शक्तिहरू जनताको अग्नि परीक्षामा असफल भइसकेका छन्। गलत साबित भइसकेका छन्,’ उनले भने।
यस्तै पार्टीका साथीहरूले मधेसमा गएर संघीयताको विरोध नगर्न सुझाव दिएको समेत उनले बताए।
'संघीयताले तपाईंलाई के दियो? संघीयता लागू भएपछि तपाईंको जीवनस्तर परिवर्तन भएको छ? संघीयताले मधेस सुदृढ भएको छ?,' उनले प्रश्न गरे, 'संघमा ५० जना र प्रदेशमा त्यति नै हाराहारीमा मन्त्री पाउने बाहेक संघीयताले मधेसलाई केही दिएन, हामी यो कुरा बुझाउन पनि मधेस झरेका हौं।'
