नेपाली कांग्रेसका प्रतिनिधि सभा सांसद विनोद चौधरीले बाँसबारी छाला जुत्ता कारखानाको सेयर खरिद-बिक्री वियष राजनीतिक बन्नु दुःखलाग्दो कुरा भएको बताएका छन्।
सोमबार प्रतिनिधि सभा बैठकमा बोल्दै सांसद चौधरीले बाँसबारी कारखानाको विषय नितान्त आर्थिक भएको भन्दै यो राजनीतिक विषय बन्नु दुःखलाग्दो कुरा भएको बताएका हुन्।
त्यस्तै बाँसबारी कारखानाको सेयर तत्कालीन सरकारले थालेको प्रक्रिया अनुरूप खरिद भएको उनले बताए।
प्रजातन्त्रको पुनर्स्थापनापछि, २०४८ सालताका सरकारले खुला बजार अर्थतन्त्र, आर्थिक उदारीकरण र निजीकरणमा जाने नीति अवलम्बन गरेको थियो। सोही नीतिअनुरूप राज्यको स्वामित्वमा रहेका संस्थानहरूको निजीकरण प्रक्रिया सुरू भएको उनले बताए।
त्यो बेला सरकार आफैंले चलाइरहेका उद्योगहरूको सञ्चालनमा आर्थिक भार बेहोरिरहेको थियो। त्यो भार क्रमशः घटाउँदै लैजाने उद्देश्यले प्रथम चरणमा बाँसबारी छाला जुत्ता, भृकुटी र हरिसिद्धि इँटा गरी तीनवटा उद्योगको निजीकरण गर्ने निर्णय सरकारले गरेको पनि उनले बताए।
'बाँसबारी छाला जुत्ता कारखानासँग च्याम्पियन फुटवेयर कारखानाको नाममा भएको २५ प्रतिशत सेयर समेत लिलामीमार्फत् बिक्री गर्ने तत्कालीन नेपाल सरकारको निर्णय अनुसार लिलामीको दोस्रो सूचनामा उत्कृष्ट प्रस्ताव गर्ने सेयरधनीलाई निजीकरण कानुनबमोजिम सेयर हस्तान्तरण भएको थियो,' चौधरीले भने।
चौधरीले आफू विगत ४५ वर्षदेखि नेपाललाई आर्थिक रूपमा सम्पन्न बनाउने अभियानमा सक्रियतापूर्वक लागेको समेत बताए। नेपाललाई आर्थिक रूपमा सम्पन्न बनाई विश्वमा नेपालको गौरव बढाउन सकिन्छ भन्ने गहिरो विश्वासले आफूलाई यो बाटोमा डोहोर्याइरहेको पनि उनले बताए।
'म आफ्नो उद्यम व्यवसायको माध्यमबाट होस्, निजी क्षेत्रका नेतृत्वदायी संस्था नेपाल उद्योग वाणिज्य महासंघ र नेपाल उद्योग परिसंघको अध्यक्षका रूपमा होस् वा राजनीतिका माध्यमबाट, मेरो एक मात्र उद्देश्य नेपाललाई आर्थिक रूपमा सम्पन्न मुलुकका रूपमा स्थापना गर्ने हो,' उनले भने।
