नेकपा (एमाले) का अध्यक्ष केपी शर्मा ओलीले कसैविरूद्ध उजुरी पर्नेबित्तिकै त्यो मान्छे मन्त्री बन्न नपाउने हो भने नेपालमा कोही मन्त्री बन्न नसक्ने बताएका छन्।
मंगलबार धनगढीमा आयोजित पत्रकार भेटघाटमा उनले उजुरी जो कसैलाई पर्न सक्ने भन्दै त्यही आधारमा मन्त्री बन्न नपाउने तर्क गर्न नमिल्ने बताएका थिए।
उनले उपप्रधान तथा गृहमन्त्री रवि लामिछानेविरूद्ध पोखराको सूर्यदर्शन सहकारीको पैसा अपचलनमा उजुरी परेको भन्दै प्रमुख प्रतिपक्षी नेपाली कांग्रेसले उठाएको प्रश्नका सन्दर्भमा यस्तो जवाफ दिएका हुन्।
‘उजुरी दर्ता त एकछिन तपाईंको नाममा अर्काले दर्ता गरे के हुन्छ? उजुरी दर्ता गर्नेबित्तिकै मन्त्री हुन नपाउने हो भने नेपालमा मन्त्री नै खाली हुन्छ। संसद खाली हुन्छ। सबै खाली हुन्छ। सबैलाई लगेर उजुरी हालिदिए भइहाल्यो नि!,’ उनले भने, ‘गम्भीर अपचलन देखिँदा, हिनामिना हुँदा...। अस्ति कुरा उठेको थियो, नेपाली कांग्रेसबाट मन्त्री भएकाहरूको सन्दर्भमा कुरा उठेको थियो। झन्डा हालेर अख्तियारमा बयान दिइरहनुभएको छ। मुद्दा एकपछि अर्को छ, यस्तो अवस्थामा तपाईंहरू मन्त्रीको पद लिइरहेर छानबिन, अनुसन्धान र न्यायमा प्रभावित गर्न नखोजेर किनारामा बस्नुस्।’
उनले सानो अबगाल आउँदा, बोली चिप्लिएका भरमा पनि राजीनामा दिएको प्रसंग सुनाए।
‘बोली चिप्लिएका भरमा हामीले शेरबहादुर तामाङलाई राजीनामा गराएका थियौं। एउटा भनाइ चिप्लिएको भरमा गोकुल बाँस्कोटालाई राजीनामा गराएका थियौं। भनाइ चिप्लिएको हो, त्यसमा केही पनि थिएन,’ उनले भने, ‘शेरबहादुरले त हाम्रा दिदीबहिनीहरूलाई बाहिर लगेर दुरूपयोग भएको सुनिन्छ भन्ने सुनेको कुराको अभिव्यक्ति दिनुभएको थियो। त्यसलाई आपत्तिजनक भयो भनेर धेरै हल्लाखल्ला भयो। उहाँले त्यसबाट दिदीबहिनीमा चोट पुगेकोप्रति क्षमतायाचना गर्नुभयो। राजीनामा दिनुभयो।’