प्रमुख प्रतिपक्षी नेपाली कांग्रेसले उपप्रधान तथा गृहमन्त्री रवि लामिछानेमाथि सहकारी प्रकरणमा अनुसन्धान गर्न पर्याप्त प्रमाण भएको बताएको छ।
प्रतिनिधि सभाको मंगलबारको बैठकमा गृहमन्त्री लामिछानेमाथि अनुसन्धान गर्नु नपर्ने प्रहरीको ब्रिफिङ रहेको प्रधानमन्त्री पुष्पकमल दाहाल 'प्रचण्ड'ले बताएपछि यस भनाइमा असन्तुष्टि जनाउँदै कांग्रेसले पर्याप्त प्रमाण भएको दाबी गरेको हो।
कांग्रेस प्रमुख सचेतक रमेश लेखकले बैठकमा बोल्दै भने, ‘मेरो नेता सम्माननीय प्रधानमन्त्रीजीले कुनै प्रमाण छैन भन्नु भएको छ। म भन्छु- कुनै होइन, पर्याप्त प्रमाण छ। यसको छिनोफानो कसले गर्छ सभामुख महोदय?’
उनले संसदीय छानबिन समिति गठन गर्न आग्रह गरेका छन्।
‘म चुनौती दिन चाहन्छु- प्रधानमन्त्री प्रमाण छैन भन्दै हुनुहुन्छ। म प्रमाण छ भन्दैछु। यही सदनभित्र छानबिन समिति गठन गरौं। प्रमाण छ कि छैन त्यो पनि हेरौं,’ उनले भने।
उनले प्रधानमन्त्री दाहाललाई नै गलत जानकारी दिइएको भन्दै चिन्ता व्यक्त गरेका छन्।
‘प्रधानमन्त्रीलाई नै गलत जानकारी दिइँदैछ। गलत सूचना प्राप्त हुँदैछ। प्रधानमन्त्रीजी नै अँध्यारोमा हुनुहुन्छ भने यो कुराको निष्पक्ष छानबिन होला?,’ उनले प्रश्न गरे, ‘प्रधानमन्त्रीजीले भन्नुभयो प्रमाण छैन। पोखरा महानगरले सूर्यदर्शन सहकारीबाट गोर्खा नेटवर्क प्रालिका नाममा रवि लामिछानेको नाममा पुलेसो कर्जा नम्बर ११६-४४५६ खडा गरी खाता नम्बर ४९-००७७० मार्फत पेश्की फर्सौट गर्यो भनेर लेखेको यो प्रमाण होइन?’
साथै यसबारे ४२६/१२९ नम्बरमा जाहेरी कास्की प्रहरीमा दर्ता रहेको पनि उनले बताए।
‘२०८० माघ २२ गते पीडित जाहेरी दर्ता लिएर गएका छन्। पुरानै जाहेरी दर्ता गरेकोले त्यसैको निरन्तरताको रेकर्ड प्रहरीले राखेको छ। पीडितको जाहेरी प्रमाण होइन?,’ उनले प्रधानमन्त्री दाहाललाई लक्षित गर्दै प्रश्न गरेका छन्।
प्रधानमन्त्रीले सहकारी पीडितका कुरा गम्भीरतापूर्वक नलिएको पनि लेखकको भनाइ छ। ‘प्रधानमन्त्रीजी दुई/तीन दिनअघि पोखरा जाँदा सहकारी पीडितले भेटेका हुन् कि होइनन्?,’ उनले भने, ‘सहकारीको रकम अपचलन भयो। त्यो रकम अपचलन गर्नेमध्ये एक जना क्याबिनेटकै उपप्रधान तथा गृहमन्त्री रवि लामिछाने पनि हुनुहुन्छ भनेर हजुरलाई भनेको हो कि होइन? यो प्रमाण होइन?’
लेखकले यी प्रमाण नभए के हुन् भनेर प्रधानमन्त्रीलाई सोधेका थिए। ‘के प्रमाण हुँदा अनुसन्धान हुँदो रहेछ? प्रमाण हो के?,’ उनले भने, ‘तत्काल प्राप्त प्रमाण भनेको पीडितले प्रहरी कार्यालयमा जाहेरी दिएको छ र त्यससँग केही तत्काल प्रमाण छन् भने त्यसमा अनुसन्धान हुन्छ। यतिका प्रमाण हुँदा पनि अनुसन्धान नहुने हो भने प्रधानमन्त्री र गृहमन्त्रीले भन्नुपर्यो के कुरा ल्याएपछि छानबिन हुन्छ भनेर।’
कांग्रेसले प्रतिनिधि सभा बैठकका कामकारबाहीलाई अवरोध गर्न नचाहेको पनि उनले बताए।
यो पनि: सहकारी प्रकरणमा गृहमन्त्री लामिछानेमाथि अनुसन्धान गर्नु नपर्ने प्रहरीको ब्रिफिङ छः प्रधानमन्त्री