कोशी प्रदेश सरकारले भोजपुरको आगलागीमा परेर ज्यान गुमाएका तीन बालबालिकाको दुई परिवारलाई एक–एक लाख रुपैयाँ राहत प्रदान गरेको छ।
मंगलबार मुख्यमन्त्री केदार कार्कीले घटनास्थलमै पुगेर राहत रकम प्रदान गरेका हुन्।
भोजपुरको हतुवागढी ७ पिप्लेमा चैत ३ गते भएको आगलागीमा परी एकै परिवारका तीन जना बालबालिकाको ज्यान गएको थियो।
५ वर्षका प्रनिष कार्की र ७ वर्षकी बालिका दिपशिखा कार्की र ३ वर्षका बालक दियुनिष कार्कीले आगलागीमा परेर ज्यान गुमाएका थिए।
मृतक प्रनिष हतुवागढी निवासी केदार कार्कीका छोरा हुन् भने केदारका भाई रमेश कार्कीका छोरी दिपशिखा र दियुनिष हुन्। बालबालिका खेलिरहेको गोठमा अचानक आगलागी हुँदा उनीहरूको मृत्यु भएको प्रहरीले जनाएको छ।
घटनास्थल पुगेका मुख्यमन्त्री कार्कीले आगलागीबाट भएको क्षतिको स्थलगत अनुगमन गर्दै जानकारी समेत लिएका थिए।
