नेकपा (एकीकृत समाजवादी) को सचिवालय बैठक बस्दैछ।
पार्टी कार्यालय आलोकनगरमा बुधबार दिउँसो दुई बजे बैठक बोलाइएको सचिव जीवनराम श्रेष्ठले जानकारी दिए।
उनका अनुसार इलाम–२ को प्रतिनिधि सभाको उपचुनाव र बझाङ–१ को प्रदेश सभाको निर्वाचनको विषयमा छलफल गर्न बैठक बोलाइएको हो।
‘निर्वाचन प्रयोजनका लागि हामीले प्रतिनिधि सभातर्फ र प्रदेश सभातर्फ पनि दल दर्ता गरिसकेका छौं। उम्मेदवार सिफारिसको प्रक्रिया पनि अघि बढेको छ,’ उनले भने।
यस्तै बैठकमा सत्ता गठबन्धन, गठबन्धनले अघि सारेको न्यूनतम साझा कार्यक्रमका बारे पनि छलफल हुने उनले जानकारी दिए। ‘सत्ता गठबन्धन, सरकारमा सहभागिताबारे पनि छलफल गर्ने कार्यसूची रहेको छ,’ उनले भने।
इलाम–२ को प्रतिनिधि सभा र बझाङ–१ को प्रदेश सभा सदस्यका लागि वैशाख १५ गते उपनिर्वाचन हुँदैछ। दुवै निर्वाचन क्षेत्रमा चैत २४ गते उम्मेदवारी दर्ता हुनेछ।