नेपाली कांग्रेसका राष्ट्रिय सभा सांसद जितजंग बस्नेतले प्रधानमन्त्री पुष्पकमल दाहाल 'प्रचण्ड' लाई लक्षित गर्दै देश र जनतालाई फुटबल ठानेको आरोप लगाएका छन्।
राष्ट्रिय सभाको बुधबारको बैठकमा बोल्दै उनले प्रधानमन्त्रीले आफूलाई 'स्ट्राइकर' ठानेर उथलपुथल गर्ने लगायतका अभिव्यक्ति दिने गरेको बताए।
'स्ट्राइकर' कहलिएका मेसी र रोनाल्डो पनि पेनाल्टीमा चुकेको उदाहरण दिँदै उनले प्रधानमन्त्री दाहाललाई खुट्टा उचाल्ने काममा सन्तुलन नमिल्दा पैतला चिप्लिएर कम्मर भाँचिने जोखिम हुने बताए।
‘यस नयाँ मन्त्रीपरिषद्ले जनतामा देखिएको निराशा र बादल हटाएर आशाका किरणहरु छर्नेछन् भन्ने कुरामा हामी पनि विश्वास गर्दछौँ। यो विश्वास मेरो मात्र नभई देश र विदेशमा रहेका नेपालीहरुको हो,’ उनले भने, ‘यति हेक्का राख्नुहोस्, यस विश्वास र रातारात गठबन्धन भत्काएर उथलपुथल ल्याउने भाषण गरेजस्तो हुँदैन। प्रधानमन्त्रीज्यूले रुखको छहारीको जाडो लाग्यो भन्दै घाम तापेर घण्टी बजाउन सुरू गर्नुभएको छ।’
(न्युज एजेन्सी नेपाल)
