नेपाल समाजवादी पार्टी (नेसपा) का अध्यक्ष बाबुराम भट्टराईले पार्टीका केही नेताहरू नेकपा (माओवादी केन्द्र) मा जान लागेको बताएका छन्।
तर ७० प्रतिशत केन्द्रीय कार्यकारिणी समिति सदस्य आफूहरूसँगै रहेको उनले बताए।
अर्का अध्यक्ष तथा प्रतिनिधि सभा सांसद महिन्द्र राय यादव, सहअध्यक्षसमेत रहेका बागमती प्रदेश सभा सदस्य गंगानारायण श्रेष्ठलगायतले नेसपालाई माओवादीमा एकता गर्ने गत शनिबार सहमति गरेका थिए।
भट्टराईले बुधबार काठमाडौंमा पत्रकार सम्मेलन गरी माओवादीमा जान चाहेकाहरूलाई आफूले नरोक्ने बताए।
‘मित्रहरूलाई आग्रह छ, स-सम्मान जाँदा हुन्छ। सक्नुहुन्छ भने हामीलाई नै साथ दिनुहोस्। सक्नु हुन्न थाक्नुभयो भने तपाईंहरू जानुहोस्,’ अर्का अध्यक्ष यादवसहितलाई लक्षित गर्दै भट्टराईले भने, ‘राजनीतिमा रडाको गर्न हुँदैन। हामी उहाँहरूसँग दन्तबझान गरेर र सांसद खोस्ने गरी मुद्दा मामिला गरेर बस्ने पक्षमा छैनौं।’
उनले माओवादीका अध्यक्ष पुष्पकमल दाहाल 'प्रचण्ड' लाई आफूले मेसेज गरेर केही साथीहरू आउन चाहेकोले भित्र्याउन आग्रह गरेको पनि बताए।
‘मैले त प्रचण्डजीलाई मेसेज पठाएको छु, लौ न! उहाँहरूले त्यत्रो मरिहत्ते गर्नुभएको छ भित्र्याउनुस्। किन यस्तो रडाको गर्या?,’ उनले भने, ‘पार्टी प्रवेश गर्दा सांसद पद जान्छ कि भनेर उहाँहरूलाई डर लागेको होला, हामी खोस्दैनौं त।’
अध्यक्ष यादव पक्षले नेसपा अध्यक्षबाट भट्टराईलाई हटाउन हस्ताक्षर अभियान चलाउने तयारी गरेका छन्।
‘उहाँहरू सिधै अर्काको पार्टीमा जाने भन्नु हुन्छ, सम्झौता गरिसक्नु भएको छ। फेरि यहाँ किन हस्ताक्षर गर्ने?,’ उनले प्रश्न गरे, ‘पार्टीलाई नै किन लैजानुपर्यो, गए भइहाल्यो। ४० प्रतिशत केन्द्रीय सदस्य नपुगेर उहाँहरूले थकाउने काम गर्नुभएको छ, त्यसो नगर्नुहोस्।’
भट्टराईले नेसपालाई वैकल्पिक शक्तिकै रूपमा अगाडि बढाइने बताएका छन्।
यो पनि:
गंगानारायणले किन छाडे बाबुरामको साथ?
माओवादी केन्द्र र नेसपाबीच पार्टी एकता गर्ने सहमति