सत्तारूढ नेकपा (एमाले) का सांसद रघुजी पन्तले गृहमन्त्रीबारे नेपाली कांग्रेसले बलियो आधार र प्रमाण तथा राजनीतिक तर्क पेस गरे त्यसलाई सरकारले सम्बोधन गर्नुपर्ने बताएका छन्।
संघीय संसद भवन परिसरमा बुधबार पत्रकारहरूसँग कुराकानी गर्दै उनले प्रतिपक्षीले बलियो प्रमाणसहित आधार प्रस्तुत गरे त्यसलाई नमान्ने भन्ने नहुने बताएका हुन्।
उनले दबाबका आधारमा मात्रै राजीनामा मागेर सरकारलाई कामै गर्न नपाउने स्थिति भने प्रतिपक्षीले गर्न नहुने बताए।
सहकारी प्रकरणमा उपप्रधान तथा गृहमन्त्री रवि लामिछाने जोडिएको भन्दै कांग्रेसले संसदीय छानबिन समिति गठनको माग गरिरहेको छ।
‘प्रकाश ज्वालाजीको राजीनामाको कुरा मैले धेरै जोडले उठाएको थिइनँ तर त्यो बेलाको सरकारले स्वयं आयोग गठन गरेको हो, हामीले गठन गर भनेको होइन। सरकारले बनाएको आयोगले मन्त्रीलाई दोषी देखाइसकेपछि मन्त्री कसरी बसिरहन मिल्छ?,’ उनले भने, ‘ज्वालाजीलाई राजीनामा दिन बाध्य पार्ने अवस्था सरकार स्वयंले गरेको हो। हिजो हामीले ठाउँमा प्रशस्त आधारहरु थिए, त्यस्तै आधार बलियो, आधार प्रमाण राजनीतिक तर्कहरु अहिलेको प्रतिपक्षले ल्याउँछ भने त्यसलाई नमान्ने भन्ने हुँदैन तर दबाबको आधारमा मात्रै राजीनामा मागेर सरकारलाई कामै गर्न नपाउने स्थिति कुनै पनि प्रतिपक्षले उठाउनु हुँदैन।’
एमाले प्रतिपक्षमा रहेको बेलामा प्रशस्त आधार र प्रमाणसहित मन्त्रीहरुको राजीनामा मागेको उनले दाबी गरेका थिए।
(न्युज एजेन्सी नेपाल)