उपप्रधानमन्त्री तथा गृहमन्त्री रवि लामिछानेले बिरामी भएकाले माओवादी केन्द्रका उपाध्यक्ष कृष्णबहादुर महरालाई हाजिरी जमानीमा छाडेको बताएका छन्।
शनिवार काठमाडौंमा आयोजित एक कार्यक्रममा बोल्दै उपप्रधानमन्त्री लामिछानेले महरा बिरामी भएकाले हाजिरी जमानीमा छाडिएकोले अतिरञ्जित नगर्न आग्रह गरेका हुन्।
मन्त्रि लामिछानेले महरा भनेको बेलामा अनुसन्धानमा उपस्थित गराइने गरी छुटेको पनि बताए।
‘कहिलेकाँही मानवीय समवेदन र करुणाका कुराहरु छाउँछन्। ८/१० वटा औषधि सेवन गरिरहनुभएको छ। अत्यन्त धेरै बिरामी हुनुहुन्छ। सम्मानित अदालतले पनि विरामी हुनुभएको कुरालाई इंगित गरेको छ। र कतिले उहाँलाई देखायो, छोड्यो भनेर तुरुन्तै निराशा जनाउन भएको छ। राज्य निर्मम पछि हुन्छ, कठोर पनि हुन्छ। तर राज्यसँग करुणा भएन भने त्यो अन्याय हुन जान्छ। त्यसैले अत्यन्त धेरै बिरामी, अत्यन्त नाजुक स्वास्थ्य अवस्था भएको मान्छेलाई कसैको हाजिरी जमानीमा छोडिएको कुरालाई अतिरञ्जित गरिरहनु पर्दैन,’ उनले भने।
उनले यसबारे अदालतले पनि स्पष्ट पारिसकेकोले नकारात्मक टिकाटिप्पणी आवश्यक नभएको बताए। दोषी नछुटुन् र निर्दोष नफसुन् भन्नेमा आफू प्रतिबद्ध रहेको पनि उनले बताए।
‘माछा ठूलो होस्, चिप्लो होस, बाठो होस, जस्तोसुकै होस। उम्कदैन। माछा उम्केको एक मिनेटमा पदबाट राजीनामा दिएर आउँछु,’उनले भने।