राष्ट्रिय स्वतन्त्र पार्टीका उपसभापति एवं सांसद स्वर्णिम वाग्लेले रास्वपाबाट सरकारमा गएका मन्त्रीहरूले फिल्मको ट्रेलर सुरू गरिसकेको बताएका छन्।
शनिबार पार्टीले काठमाडौंमा गरेको कार्यक्रममा बोल्दै वाग्लेले उपप्रधानमन्त्री तथा गृहमन्त्री समेत रहेका सभापति रवि लामिछानेले गरेको कामले रास्वपाको ट्रेलर सुरू भइसकेको बताएका हुन्।
उनले प्रधानमन्त्रीकै मान्छे भएपनि रास्वपाले नछाड्ने सन्देश गएको बताउँदै नेपाली राजनीतिको मूल प्रवाहमा रास्वपा आइसकेको बताए।
‘कृष्णबहादुर महरा भनेको चानचुने राजनीतिक पात्र होइन । ०६२/०६३ पछि त उहाँ उपप्रधानमन्त्री, सभामुख, गृहमन्त्री, परराष्ट्रमन्त्री,अर्थमन्त्री दोहोर्याइ,तेहर्याई हुनुभएको छ । वहालवाला प्रधानमन्त्रीका अनन्य मित्र त्यति नजिकको पात्रलाई पनि हामीले कानूनको घेराभित्र ल्याएका छौँ । त्यो सानो कदम होइन, त्यसले एउटा संकेत गरेको छ । कृष्णबहादुर महरासमेत सत्तासँग यति नजिक, सत्तारुढ दलको उपाध्यक्षलाई समेत कानूनी घेरामा ल्याउनसक्छौँ भने अरु त त्यति ठूलो रहेन । त्यो संकेत दिन खोजेको पनि हो,’ उनले भने।
वाग्लेले आरती साहको मुद्दालाई टुंगोमा पुर्याउने प्रक्रिया सुरू भएको, सरकारले पन्छ्याएको आयोगहरु पुनः सक्रिय बनाउने काम सुरू गरेको, मिटरब्याज पीडितहरुदेखि सहकारीको समस्या समाधानका लागि आवश्यक काम अघि बढाएको बताए।
उपसभापति वाग्लेले रास्वपा अभिमन्युझैँ चक्रभित्र पस्न मात्रै जान्ने र निस्किन नजान्ने नभइ चक्र भित्र बसेर पनि निस्किने रोडम्याप आफूहरुसँग रहेको बताए।
(न्युज एजेन्सी नेपालबाट)