नेकपा (एमाले) कास्कीमा नयाँ नेतृत्व चयन गर्न सोमबार निर्वाचन हुँदैछ। निर्वाचनमा पार्टी उपमहासचिव पृथ्वीसुब्बा गुरूङ र स्थायी कमिटी सदस्य खगराज अधिकारी समूह बनाएर निर्वाचनमा होमिने तयारी गरेका छन्।
पृथ्वीसुब्बा समूहबाट एमाले कास्कीको अध्यक्षमा माधव बास्तोला र सचिवमा सुरेन्द्र गुरूङलाई उम्मेदवार बनाउने तयारी गरेका छन्। सबै पदाधिकारी र जिल्ला समितिमा प्यानल बनाउने तयारी गरे पनि अहिलेसम्म टुंगो लागिसकेको छैन।
खगराज प्यानलबाट अध्यक्षमा हालका सचिव बैनबहादुर क्षेत्री र सचिवमा दर्शन लामा उम्मेदवार बन्दैछन्। यस समूहबाट जिल्ला कमिटीको पदाधिकारी र सदस्यसम्म प्यानल बनाउने तयारी भइरहेको छ।
एमाले कास्कीको अध्यक्षका उम्मेदवार बास्तोला मदन भण्डारी फाउण्डेसन कास्कीका अध्यक्ष हुन्। उनी युवा संघको केन्द्रीय उपाध्यक्षसमेत बनेका थिए।
यता, क्षेत्री एमाले कास्कीका सचिव हुन् । क्षेत्री २०७४ को निर्वाचनबाट जिल्ला समन्वय समिति कास्कीका सभापति समेत बनेका थिए।
शनिबार सुरू भएको बन्द सत्रमा आइतबार अध्यक्ष मनबहादुर गुरुङले राजनीतिक, सचिव बैनबहादुर क्षेत्रीले सांगाठानिक र आर्थिक विभाग प्रमुख चिरञ्जीवी पोखरेलले आर्थिक प्रतिवेदन पेश गरेका थिए।
यी तीनवटै प्रतिवेदनमाथि छलफल गर्न एमाले कास्कीले ११ वटा समूह बनाएको छ। समूहबाट एक एक जनाले सोमबार प्रतिवेदनमाथि टिप्पणी गर्नेछन् । सुझावका आधारमा तीनवटै प्रतिवेदन पारित गरेर नयाँ नेतृत्व छनौट प्रक्रिया सुरू हुने सचिव क्षेत्रीले बताए।
‘तीनवटै प्रतिवेदनमा प्रतिनिधीले दिएको सुझाव समेटेर पारित गर्छौं, त्यसपछि नयाँ नेतृत्वका लागि निर्वाचन प्रक्रिया सुरू हुन्छ,’ उनले भने।
अधिवेशनबाट एमाले कास्कीमा १ सय २० सदस्यीय जिल्ला कमिटी निर्वाचित हुनेछन्। अधिवेशनमा ९ सय ३५ जना प्रतिनिधि छन्।